Энэ мэдээ хуучирсан буюу 2015/09/10-нд нийтлэгдсэн мэдээ болно.

Англи хэл сурах чин хүсэлтэй 1800 хүнийг үнэ төлбөргүй сургана



Гадаадад байгаа залуус нийслэлийн 1800 иргэнд англи хэл үнэ төлбөргүй заахаар болсон байна. Энэ талаар Дэлхийн монголын залуучуудын холбооноос мэдээлэл хийлээ. Тус холбоо 2015 оныг “Сурсан мэдсэнээ тантай хуваалцая” уриан дор улс даяар сайн дураараа өөрсдийн сурсан мэдсэнээ хуваацахаар зорин ажиллаж байгаа аж. Тодруулбал, Дэлхийн 34 оронд салбартай Дэлхийн улс орон дахь монголын оюутан, залуучуудын холбооны 100 гаруй залуус санал нэгдээд энэхүү үйл ажиллагаа өрнүүлж байгаа гэнэ. Өнгөрсөн хугацаанд “Англи хэлтэй дотуур байр”, “Англи хэлтэй аймаг” аянуудыг өрнүүлсэн байна. “Англи хэлтэй дотуур байр” аян өнгөрсөн нэгдүгээр сараас дөрөвдүгээр сарын хооронд 20 орчим дотуур байрны 5000 орчим оюутан залууст өөрсдийн үйл ажиллагаагаа үнэ төлбөргүйгээр хүргэсэн гэнэ. 

Улмаар англи хэлний сургалтыг холбогдох байгууллагын батламжтай, гадаадад магистр, докторын зэрэг хамгаалсан залуус “ирээдүй таны гарт” лекц, “илтгэх урлагийн сургууль” –ийн үнэ төлбөргүй зохион байгуулсан байна. Харин “Англи хэлтэй аймаг” аян өнгөрсөн зургадугаар сараас наймдугаар сарын хооронд 18 аймагт нийт 15 мянган иргэдэд үйл ажиллагаа хүргэж чаджээ. Энэхүү аяны хүрээнд аймгийн Засаг дарга болон аймгуудын аж ахуйн нэгж байгууллагуудын удирдлагуудтай хамтын ажиллагаа тогтоож, тухайн аймгийн иргэдэд Англи хэлний бүх төвшингийн сургалтыг зохион байгуулжээ. Түүнчлэн аймаг бүрийн ерөнхий боловсролын сургууль болон аймгийн их, дээд сургуулиудад лекц, илтгэх урлагийн сургалт зэргийг мөн үнэ төлбөргүйгээр явуулсан байна. 

Харин одоо төгсгөлийн үе шат болох “Англи хэлтэй дүүрэг” аяныг эхлүүлэхээр болжээ. Дэлхийн улс орнуудад суралцдаг Монголын Оюутан, Залуучуудынхолбооны тэргүүн Н.Лхагвадорж “Монгол залуучууд гадаад руу сурахаар явахаараа буцаж ирдэггүй. Сурч мэдсэнээ бусадтайгаа хуваалцдаггүй гэсэн яриа нийгэмд түгсэн байдаг. Тэгвэл тийм биш юм, бид юу сурсан түүнийгээ тантай, үе тэнгийн залуус, найз нөхөдтэйгөө хуваалцдаг юм шүү гэдгийг харуулахыг зорьж байна. Өнөөдөр манай залуучууд гадаадад жаргалтай юм шиг царайж зовохын оронд Монголдоо ирээд сурсан мэдсэнээ хуваалцаж, өөрөө өөрийгөө үнэ цэнэтэй байлгая. Энэ үндсэн дээр дэлхийн улс орнуудад суралцдаг 100 гаруй залуу нэгдэж иргэдэд үнэ төлбөргүй англи хэлний мэдлэг олгох “Англи хэлтэй дүүрэг” хөтөлбөрийг хэрэгжүүлж эхлэхэд бэлэн болоод байна. Үүнд нийслэлийнесөн дүүргийн ЗДТГ хамтран ажиллаж тусална гэдэгт итгэж байгаа” гэсэн юм. 

“Англи хэлтэй дүүрэг” хөтөлбөрийн хүрээнд 1800 иргэнд үнэ төлбөргүй сургалт  явуулах бөгөөд иргэдийг анхан, дунд, гүнзгий шат гэж ангилах юм байна. Сургалтад хамрагдах сонголтыг хийхдээ есөн дүүргийн хороодоор дамжуулан 10 мянган ширхэг сугалаа тараах гэнэ. Өөрөөр хэлбэл, үнэхээр сурах чин хүсэлтэй иргэдийн дунд сугалаа тарааж, 1800 иргэнийг сонгох юм байна. Сургалт ирэх аравдугаар сарын 1-нээс арваннэгдүгээр сарын дундуур дуусах аж. Нийт 48 цагийн хичээл заах бөгөөд хичээл 10.00-20.00 цагийн хооронд явагдах юм байна. Түүнчлэн гадаадад суралцдаг оюутан, залуус сургалтаас гадна 8000 хүнийг хамруулсан уулзалт, ярилцлага, лекцийг зохион байгуулахаар төлөвлөөд байгаа гэнэ. Хэрэв англи хэлний сургалтад хамрагдаад онц сурвал гадаадад сурах эрхийн бичгээр шагнах юм байна.

Эх сурвалж: www.mminfo.mn

Ж.Отгон
⇐ Шинэ нисэх буудлын Шатахууны байгууламжийг турших ажил эхэлжээ
Өнөөдрийн өрнийн зурхай ⇒
Энэ мэдээ хуучирсан буюу 2015/09/10-нд нийтлэгдсэн мэдээ болно.