Компани байгуулаад байгууллагынхаа тендерт ялж 129 сая төгрөг “халаасалсан” гэх НОБГ-ын дарга асан хурандаа Н.Уламбаярын хэргээс ...

Энэ хэрэг 2014-2015 онд гарсан агаад таван жил нь өнгөрч байгаа тул хэрэгсэхгүй болох магадлал тун өндөр болжээ. Ийм л зорилгоор зориуд удаан шалгасан байх гэдэг хардлага төрдөг. 2013-2017 онд НОБГ-ын даргаар ажиллаж байсан хурандаа Н.Уламбаяр нь хотын хөрөнгөөр гал унтраах тусгай тоноглогдсон хоёрын хоёр машин худалдан авахаар төлөвлөснийг сайн мэдэж байсан нь эргэлзээгүй. Тийм ч учраас албаны шугмаар өөрт авагдсан мэдээллийг ашигласан ч гэж үзсэн. Хурандаа яг тохирсон чиглэл буюу “галын машин, механизм, тоног төхөөрөмжийн худалдаа” эрхлэх “Тэнгэрийн давалгаа” компанийг үйлчлэгч, цахилгаанчин туслах, ажилтан бас орчуулагч хэмээх олон албан тушаалд ажиллаж байсан Б.Насантогтохыг гүйцэтгэх захирлаар томилон байгуулжээ. Ингээд өөрөө бичиг баримтыг нь боловсруулаад галын машин авах хоёр ч тендерт орсон байна. Даргатан бүхнийг өөрөө хийсэн аж. Уг тендерийн эрх НОБГ-д шилжин ирсэн тул бүр ч амар болсон. Хурандаа Үнэлгээний хороог өөрөө зохион байгуулж компаниа ялуулаад, өөрийнхөө компанийг дэмжсэн албан бичгийг нийслэлийн Худалдан авах ажиллагааны газарт хүргүүлжээ. Улмаар өөрийнхөө компанид гэрээ байгуулах эрх олгож галын машин нийлүүлэхээр 200 сая төгрөгийг төсвөөс авчээ. Дараа жил нь энэ аргаараа мөн л галын машины 340 сая төгрөгийн тендерт ялсан байна. Ингээд нийтдээ 540 сая төгрөгийг авч чаджээ. Мөрдөн байцаалтаар хурандаа эхний тендерээс 11,3 сая, дараагийн тендерээс 118,4 буюу нийт 129,7 сая төгрөгийг “халаасалсан” гэж тогтоосон байна. Н.Уламбаяр хууль эрх зүйн мэдлэг муугийн улмаас ийм хэрэг “хийсэн” гэжээ. Мөн тогтоогдсон хохирлын хэмжээг багасгах хүсэлт гаргасан. Үүнд Солонгос явахад гаргасан хувийн зардал болох 58 сая, галын хоёр машинд нэмэлт тоноглол хийлгэсэн бол тээврийн зардал гэх 30 орчим сая төгрөгийг хасуулах гэнэ. Энэ мэт зүйлийг нэмж шалгах шаардлагатай гэж үзсэн тул хэргийг шүүх мөрдөн байцаалтанд буцаажээ. Үүнд нэлээд хугацаа орох нь ойлгомжтой тул хэргийг хэрэгсэхгүй болгох таван жилийн “болзол” тун амархан хангагдаж магадгүй байна.

⇐ Залуучуудыг хөдөлмөрт бэлтгэх "Оролцоо" төслийн 1-р ээлжинд СХД-ийн 111 залуус хамрагдана
Ой, хээрийн түймрийг сансраас авсан мэдээллээр илрүүлнэ ⇒
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!