Хятад, Франц, Германы төрийн тэргүүнүүд онлайнаар уулзжээ

БНХАУ-ын дарга Ши Жиньпин, БНФУ-ын Ерөнхийлөгч Э.Макрон, ХБНГУ-ын Канцлер Ангела Меркель нар 7 сарын 5-нд онлайн уулзалт хийжээ.

Энэ үеэр Ши Жиньпин: "Цар тахлын нөхцөл байдал одоо ч хүндхэн хэвээр байгаа төдийгүй эдийн засаг хэзээ сэргэх нь тодорхойгүй байна. Дэлхийн ертөнцөд өмнөх аль ч үеэс илүүтэйгээр итгэлцэл, харилцан хүндэтгэл, үнэнч хамтын ажиллагаа шаардлагатай байна. Харин нэгнийгээ хардаж сэрдэж, сөргөлдөх нь аль алиндаа ашиггүй. Тиймээс Хятад, Европ нийтлэг ойлголт, хамтын ажиллагаагаа өргөжүүлж, даяарчилагдсан сорилтуудыг даван туулахад чухал үүрэг гүйцэтгэх ёстой. Энэ бүхний тулд, нэгдүгээрт, харилцан нэгнийгээ зөвөөр ойлгох хэрэгтэй. Хоёрдугаарт, Харилцан ашигтай хамтдаа ашиг хүртэх хамтын ажиллагааг өргөжүүлэх хэрэгтэй. Гуравдугаарт, жинхэнээсээ олон ургальч үзлийг хамгаалах хэрэгтэй. Дөрөвдүгээрт, ерөнхийдөө тогтвортой, тэнцвэртэй хөгжсөн том улс гүрэн хоорондын харилцааг үүсгэх хэрэгтэй. Хятад улс өөрийгөө сайтар хөгжүүлэхийг эрмэлзэж байна, харин бусдын байр суурийг эзлэх нь Хятадын улсын хөгжлийн зорилго биш" гэв.  

Харин Э.Макрон: "Өнгөрсөн хэдэн арван жилд Хятад улс асар их хөгжлөө. Францын тал Хятад улстай үргэлжлүүлэн ажил хэрэгчээр хамтран ажиллаж, Европ-Хятадын хөрөнгө оруулалтын санал санаачилгыг дэмжиж, Хятад улстай хүмүүнлэгийн солилцоогоо өргөжүүлэх бөгөөд Хятадын аж ахуйн нэгжүүд Францад хөрөнгө оруулахыг урьж байна. Мөн Дэлхийн худалдааны байгууллагын өөрчлөлт, цаг уурын өөрчлөлт, биологийн төрөл зүйлийг хамгаалах зэрэг асуудлаар Хятад улстай улам ойлголцож, Күньмингийн “Биологийн олон янз байдлын тухай конвенц”-ыг үндэслэн байгуулагч талуудын 15-р чуулган болон Марселийн дэлхийн байгаль орчны хамгаалалтын 7-р чуулганг амжилттай зохион байгуулахыг дэмжина.

Хятад улс хөгжиж буй орнуудад вакцин шударгаар хуваарилахад чухал үүрэг гүйцэтгэж байгааг Францын тал сайшааж байгаа бөгөөд энэ чиглэлээр Хятад улстай хамтын ажиллагаагаа эрчимжүүлэхэд бэлэн.

Өрийн асуудлыг хойшлуулах тухай Их 20-ын бүлгийн санаачилгыг практик дээр хэрэгжүүлэхэд гаргасан Хятадын талын хүчин чармайлтыг Францын тал өндрөөр үнэлж байгаа бөгөөд Африк тив дэхь хөрөнгө оруулалт, боловсрол зэрэг асуудлаар Хятад улстай үргэлжлэн идэвхтэй хамтран ажиллахад Францын тал бэлэн байна" гэжээ.

Мөн онлайн уулзалтанд оролцсон, Ангела Меркель: "Хятад улс цар тахлыг ялан дийлж, эдийн засгаа хөгжүүлж буйд баяр хүргэе. Вакцины үйлдвэрлэл, хуваарилалт, хүмүүсийн зорчих болон худалдааны харилцаа холбоог сэргээж хөгжүүлэх чиглэлээр Хятад улстай хамтын ажиллагаагаа эрчимжүүлэхэд Герман бэлэн байна. Европ, Хятадын харилцаа маш чухал, тиймээс нэг нэгэндээ харилцан хүндэтгэлтэй хандаж, яриа хэлцлээр санал зөрөлдөөнөө арилгах ёстой. Европын Холбоо-Хятадын удирдагчдын 23-р уулзалтыг даруй зохион байгуулахыг Германы тал дэмжих бөгөөд Европ-Хятадын хөрөнгө оруулалтын хэлэлцээрийг даруй батлахыг хүсэж байна. Түүнчлэн Хятад улстай цаг уурын өөрчлөлтийг зохицуулах, биологийн төрөл зүйлийг хамгаалах, цар тахлын эсрэг Африкийн тэмцлийг дэмжих зэрэг асуудлаар идэвхтэй зөвшилцөхөд ч бэлэн байна" гэсэн байна.

Г.Бямбасүрэн

⇐ Ардын хувьсгалын 100 жилийн ойн хүндэт медальтай болох тогтоол батлагджээ
Хоёр эмэгтэйн толгойг тасалж, нөгөөг нь танихгүй болтол нь зэрэмдэглэж хөнөөсөн гэмт этгээд 25 жилийн ял авчээ ⇒
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!