Н.ЭНХЗАЯА: Цагдаагийн алба хаагч зүрх, судасны өвчтэй, стэнт тавиулаад 5 жил болж байсан

Увс аймаг дахь цагдаагийн газрын вакцинжуулалтыг хариуцсан “Бат-Үржихүй” өрхийн эрүүл мэндийн төвийн эмч Н.Энхзаяагаас тодрууллаа.

Танай өрхийн эрүүл мэндийн төв Увс аймаг дахь цагдаагийн алба хаагчдын дархлаажуулалтыг хариуцсан байна. Тус газарт ажиллаж байсан талийгаач Б.Лхагжавын хувьд вакцины нэгдүгээр тундаа хамрагдахад биеийн байдал хэр байсан бэ?

Манай төвөөс Увс аймгийн цагдаагийн алба хаагчдын дархлаажуулалтыг хариуцсан. Тухайлбал би 2021 оны 04-р сарын 07, 08-ны өдрүүдэд цагдаагийн газар дээр алба хаагч нарт Ковид-19 вирусийн эсрэг Вироселл вакцин хийсэн ба 07-ны өдөр Б.Лхагважав гэх хүн ирээд “Зүрхэндээ стент тавиулсан юм. Вакцин хийлгэж болох уу” гэж асуусан. Тухайн үед би түүнд “Нарийн мэргэжлийн зүрх судасны эмчээсээ зөвлөгөө авч ирээрэй” гэж хэлж явуулсан.

2021 оны 04-р сарын 09-ний өдөр Улаангом сумын Ерөнхий боловсролын 4-р сургууль дээр вакцин хийж байхад талийгаач Б.Лхагважав нь вакцин хийлгэхээр ирсэн. Би тэр хүнээс “та эмчээсээ асуусан уу” гэхэд “зүгээр гэнэ ээ хурдан хийгээд өгчих ахын дүү” гэж хэлж байсан.  Тухайн үед талийгаач Б.Лхагважавын даралт, пульс, сатурацийг үзэхэд хэвийн байсан тул тусгай программд бэлтгэсэн ковид-19 вирустай холбоотой тухайн үеийн биеийн байдлыг тодорхойлох асуумжыг талийгаачаас асууж авсан. Нэмэлтээр амьсгаадах, зүрх дэлсэх, цээж бачимдах, зүүн гар дагасан өвдөлттэй байгаа эсэхийг нь асуусан.

Мөн цээжний зүүн талд болон хөл гарын эрээн булчингууд өвдөж байгаа эсэх, ямар нэгэн зовуурь өгч байна уу гэж асуусан. Энэ бүх асуултуудад талийгаач нь үгүй гэсэн хариулт өгч одоогоор надад ямар нэгэн зовуурь байхгүй гэж хэлсэн. Тиймээс ерөнхий үзлэгтээ орсон.

Талийгаачийн хувьд зүрх, судасны өвчтэй байсан гэлээ. Биеийн ерөнхий байдал нь хэр байсан бэ?

Талийгаачийн биеийн ерөнхий байдал сайн, ухаан санаа саруул, орчиндоо харьцаатай хөдөлгөөн идэвхтэй, нүүр царайны байдал тайван, уушиг чагналтаар хоёр талдаа цулцангын амьсгалтай, зүрхний авиа тод хэм жигд, хэвлий тэмтрэхэд зөөлөн байсан.

Үзлэг дуусаж дээрх хүний биеийн байдал, амин үзүүлэлтүүд хэвийн байсан учир өөрийнх нь хүсэлтээр вакцинжуулалтад хамруулсан.

Вакцин хийсний дараа 30 минутын хугацаанд ажиглалтын байранд тухайн хүнийг байлгаж ажигласан. Тэр үед ямар нэгэн сөрөг шинж тэмдэг илрээгүй тул вакцин хийсний дараа толгой өвдөх, булчин өвдөх, дотор муухайрах, ямар нэгэн хөл гарын үеэр өвдөх, архаг хууч өвчин сэдрээдэг учир деклоденк, парацетамол ууж болно. Ибупрофен ууж болохгүй, халуун бүлээн шингэн зүйл ойр ойрхон уух, архи дарс хэрэглэж болохгүй халуун ногоотой шарсан хуурсан хоол хэрэглэж болохгүй гэсэн зөвлөгөө өгсөн.

Талийгаачийн хувьд ковидын вакцины хоёрдугаар тундаа хамрагдахад биеийн байдал нь хэр байсан бэ?

2021 оны 05-р сарын 04-ний өдөр 10,00 цагийн орчимд талийгаач нь цагдаагийн газар дээр ковид-19 вирусийн эсрэг вироселл вакцины 2-р тунг хийлгэхээр ирсэн. Би вакцины дараах хариу урвалууд ямар байдлаар илэрсэн талаар ерөнхий асуумжийг программын дагуу нэг бүрчлэн асуусан.

Тухайн үед ямар нэг хариу урвал илрээгүй гэж үгүйсгэсэн. Нэмэлтээр зүрхээр хатгуулах, амьсгаадаж байна уу, хөл гарын эрээн булчингаар өвдөж байна уу, зүрхээр дэлсэж өвдөж байгаа эсэх асуултуудыг нэг нэгээр тавихад “өөр ямар нэгэн зовуурь алга, нэгдүгээр тунгийн вакцинжуулалтанд ямар нэгэн зовуурь илрээгүй тул хоёрдугаар тунг хийлгэмээр байна” гэж хэлсэн. Ерөнхий үзүүлэлт болох даралт, пульс, сатурацийг үзэхэд хэвийн байсан тул вакцинжуулалтад өөрийнх нь хүсэлтээр хамруулсан.

Вакцин хийлгэсний дараа 30 минут ажиглалтын байранд сувилагч Жаргалантуул, Чимгээ нар ажиглахад сөрөг шинж тэмдэг илрээгүй. Дээрх зөвлөгөөнүүдийг ахин өгөөд явуулсан. Өөрт ямар нэгэн зовиур илэрсэн тохиолдолд яаралтай 103-д хандаарай гэж зөвлөсөн.

Талийгаачийн хувьд зүрхний стент тавиулаад 5 жил болж байгаа гэж хэлсэн. Вакцин хийх үед зүрхний архаг дутагдлын хүндрэл байгаагүй, биеийн ерөнхий байдал сайн ухаан санаа саруул, орчиндоо харьцаатай хөдөлгөөн идэвхтэй, амин үзүүлэлтүүд хэвийн байсан ба Вероселл вакцины хориглох заалтанд хамаарахгүй байсан тул өөрийнх нь хүсэлтээр вакцинд хамруулсан болно.

⇐ Н.БАТМӨНХ : Мөр зэрэгцэн алба хааж явсан андын минь талаар буруу мэдээлэл цацаж байгаад харамсаж байна
Дархан-Уул аймгийн Засаг дарга С.Насанбат мэдэгдэл гаргалаа ⇒
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!