Монгол түмэндээ зориулав.


Шуурхай мэдээ

Б.Монголхүү: Муслим Магомаевын нэрэмжит дуулаачийн уралдаан оролцогчоос их нарийн мэдрэмж шаарддаг

Нийтэлсэн: Монгол Хүү | Урлаг
2021 05 сар 02 ・ 533
Муслим Магомаевын нэрэмжит олон улсын дуурийн дуулаачдын VI уралдаанд эх орноо төлөөлөн амжилттай оролцсон УДБЭТ-ын гоцлооч Б.МОНГОЛХҮҮТЭЙ онлайнаар цөөн хором ярилцлаа.
 
-Юуны түрүүнд цар тахлын энэ хүнд үед дуурийн дуулаачдын олон улсын уралдаанд амжилттай оролцсонд баяр хүргэе. Коронавируст халдвараас шалтгаалж багагүй хугацаанд тайзнаас хөндийрч байгаад уралдаанд оролцоход ямар санагдсан бол?
 
-Маш их баярлалаа. Энэ удаагийн уралдаан их өвөрмөц, бас хэзээ ч мартагдахааргүй болж өнгөрлөө. Ковидтой, бүх юм хаалттай нэг тийшээ явах гэхэд зөвшөөрөл шинжилгээ, Улаанбаатар хотод 00 зогсолт хийсэн гээд л тоочвол олон саад байлаа. Гэхдээ энэ бүхнийг ажралгүй бичиг баримтаа хөөцөлдөж зөвшөөрлөө аваад Сэлэнгэ аймгийн Алтанбулаг боомтоор гарсан даа.
Мэдээж олон сар дуулаагүй болохоор нэлээд бэлтгэж байгаад уралдаандаа орлоо. Энэ ташрамд, олон улсын уралдаанд бэлтгэж “сойсон” төгөлдөр хуурч Э. Намуун, УДБЭТ- ын гоцлол дуучин, Монгол Улсын Гавьяат жүжигчин Б.Эрдэнэтуяа эгчдээ болон Гавьяат жүжигчин Э.Анхбаяр найздаа маш их баярлалаа. Мөн бэлтгэл хийх боломжоор хангасан УДБЭТ, Улсын филармонийн хамт олондоо баярласан сэтгэлээ илэрхийлмээр байна.
 
-Энэ удаа хойд хөршийг ганцаар зориогүй, УДБЭТ-ын дууны ангийн анд Б.Гомбо-Очиртой хамт явлаа. Хамтдаа дэм дэмэндээ явсан болов уу?
 
-Тэгэлгүй яах вэ. “Дэм дэмэндээ дээс эрчиндээ” гэдэг шиг сайхан яваад ирлээ.
 
-Мэдээж аливаа тэмцээн уралдаанд түрүүлэх гэж оролцдог. Та өөртөө хэр итгэлтэй байсан бэ?
 
-Бэлтгэлээ сайн хийсэн болохоор өөртөө их итгэлтэй байсан. Гэхдээ уралдаан л болсон хойно санаснаар болохгүй юм даа.
 
-Дуурийн дуулаачдын уралдааны сүүлийн шалгаруулалтад хэний бүтээлээр, ямар амжилттай оролцсон бэ?
 
-Би энэ уралдаанд нийлбэр оноогоороо тавдугаар байрт шалгарсан. Сүүлийн шатны шалгаруулалтад С. Рахманиновын “Алеко” дуурийн Алекогийн ари мөн Арно Бабаджаняны “Твои Следы” дуугаар оролцлоо.
 
-Өнгөрсөн хугацаанд та ОХУ-д болсон дуурийн дуулаачдын тэмцээнүүдэд оролцсон туршлагатай. Энэ удаагийн олон улсын уралдаан тэдгээрээс юугаараа онцлог байв?
 
-Олон улсын уралдаануудад нэлээд оролцож байсан л даа. Гэхдээ Муслим Магомаевын нэрэмжит олон улсын дуурийн дуулаачдын уралдаан их өвөрмөц явагддаг. Муслим Магомаев гэж аугаа хүн өөрийн амьдарч байсан тэр цаг үедээ сонгодог бүтээлийг ч сайхан дуулчихдаг, мөн эстрадын олон сайхан дууг өөрийн онцлогтоо тохируулж, мундаг дуулдаг байсан. Тэр үүднээсээ нэрэмжит уралдаанд нь дуулах оролцогчдоос их нарийн мэдрэмжийг шаарддагаараа онцлог. Дуурийн ари дуулах гэдэг бол их өөр ойлголт гэж боддог.
 
-Монголдоо ирээд ямар уран бүтээл дээр ажиллахаар төлөвлөж байгаа бол?
 
-Мэдээж залуу хүн учраас дуулахыг хүссэн олон сайхан дүр бий. Бас хувь уран бүтээлчийнхээ талаас дууны уран бүтээл шинээр гаргах, шинэ цомог гээд ажил ундарна.
 
-Цар тахал намжиж, театр үзэгчээ хүлээн авч эхлэх үед хэний ямар уран бүтээлээр үзэгч, сонсогчидтойгоо уулзахыг хүсэж байна вэ?
 
-Энэ жил Ардын хувьсгалын 100 жилийн тэгш ойтой. Алдарт Д. Лувсаншарав гуайн “Шивээ Хиагт” дуурийг сэргээн тавьж байгаа. Тэр дуурийн Гоо Сүй Лэний дүрд дуулах байх.
 
 
Б.Сийлэн
 
Эх сурвалж: "Монголын үнэн " сонин

Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх