Монгол түмэндээ зориулав.


Шуурхай мэдээ

Ш.Дэлгэрмаа: Тэтгэврийн зээлгүй ахмадуудад олгох 1 сая төгрөгийн эх үүсвэр бэлэн болсон, удахгүй олгоно

Нийтэлсэн: Монгол Хүү | Нийгэм
2021 04 сар 16 ・ 270

Манай Улс байгалийн баялгаа ахмад настнууддаа хүртээж, зургаан сая төгрөг хүртэлх тэтгэврийн зээлтэй байсан ахмадуудын өрийг дарсан. Тухайн үед зээлгүй байсан ахмадуудад энэ оны тавдугаар сард багтаан нэг сая төгрөгийг олгох тухай мэдэгдэж байсан. Тэгвэл, дээрх мөнгөний санхүүжилт бүрдэж, тэтгэврийн зээлгүй ахмадуудад нэг сая төгрөг олгоход бэлэн болсон байна. Энэ талаар бид “Эрдэнэс силвер ресурс” компанийн захиргаа удирдлагын газрын захирал Ш.Дэлгэрмаагаас тодрууллаа.

- Тэтгэврийн зээлгүй ахмадуудад нэг сая төгрөг олгоход бэлэн болсон гэх мэдээлэл цацагдсан. Энэ талаар дэлгэрэнгүй мэдээлэл өгөөч. Санхүүжилт нь бүрдсэн гэсэн үг үү?

- Монгол Улсын Үндсэн хуульд заасан байгалийн баялаг ард түмний мэдэлд байх зарчимд нийцүүлэн “Салхитын алт, мөнгөний орд”-ыг 2043 он, 2047 он хүртэл ашиглах тусгай зөвшөөрлүүдийг 2018 онд цуцалж, төрийн мэдэлд шилжүүлсэн. Тодруулбал, тус ордод хайгуул хийх, ашиглах тусгай зөвшөөрлийг 2019 онд “Эрдэнэс Силвер Ресурс” ХХК-д шилжүүлж, төсвийн хөрөнгө оруулалтгүйгээр олборлолтын үйл ажиллагааг эхлүүлсэн. Манай компани бол “Эрдэнэс монгол” компанийн охин компани.  Бид өнгөрсөн хугацаанд “Эрдэнэс силвер ресурс” ХХК-ийн эзэмшлийн Салхитын мөнгө, алтны ордыг эдийн засгийн эргэлтэд оруулсан орлогоос төрд ногдох өгөөжийг барьцаалан үнэт цаас гаргах замаар ахмад настнуудын тэтгэврийн зээлийг бүрэн төлж барагдуулсан. Тодруулбал, 6 сая хүртэл төгрөгийн зээлтэй байсан 229 мянган иргэний 763 тэрбум төгрөгийн зээлийг тэглэсэн. Одоо тэдгээр ахмадууд маань тэтгэврээ бүтнээр авч байгаа. Харин тэтгэврийн зээлгүй ахмад настнууддаа 1 сая  төгрөгийн ваучер олгосон. Түүнийг мөнгөжүүлэх ажил өнгөрсөн хугацаанд амжилттай хийгдэж, өнөөдрийн байдлаар, манай Худалдаа хөгжлийн дансанд 219 тэрбум төгрөг төвлөрсөн байна. Өөрөөр хэлбэл, тэтгэврийн зээлгүй ахмадуудад олгох 1 сая төгрөгийн эх үүсвэр 100 хувь бүрдсэн гэсэн үг.

-Яг хэзээ ахмадуудад олгож эхэлнэ гэж тооцоолж байгаа вэ. Тодорхой болсон хугацаа байгаа юу?

-Хуулиараа бол 2021 оны тавдугаар сарын 21-нд гээд өдрийг нь тодорхой заачихсан байгаа. Бидний зүгээс Салхит ордын бий болгосон өгөөжийг “Эрдэнэс монгол” компанийн данс руу шилжүүлнэ. “Эрдэнэс монгол” компани цаашаа Монгол банк, Хөдөлмөр нийгмийн хамгааллын яамтай хамтраад ахмадуудынхаа гарт олгох ажлыг зохион байгуулна. Мэдээж санхүүжилт нь бүрдсэн учраас ахмадуудын гарт очиход нэг их хугацаа шаардахгүй байх гэж бодож байна.

-Шууд тэтгэврийн дансанд нь орох уу?

-Одоохондоо тодорхой болоогүй байна. Хуулиндаа бол ахмадууд 1 сая  төгрөгийн ваучер буюу эрхийн бичгээ барьж очоод тэтгэвэр авдаг банкнаасаа авахаар тусгагдсан байгаа. Гэхдээ цар тахлын нөхцөл байдалтай холбоотойгоор ийм боломж хомс байна. Тиймээс ямар байдлаар олгох вэ гэдэг асуудал яригдаж байна.

-Тэтгэврийн зээлгүй, нэг сая төгрөг авах эрх нь үүссэн хэчнээн ахмад байгаа вэ?

-Хууль анх гарахдаа 2019 оны 12 дугаар сарын 31-ний өдрийн тоон дээр суурилагдаж гарсан. Тодруулбал, 216 мянган ахмад зээлгүй буюу 1 сая төгрөгөөс доош зээлтэй байсан.

-Тэгэхээр 2019 оны 12 дугаар сарын 31-нээс хойш тэтгэвэрт гарсан ахмадууд яана гэсэн үг вэ?

-Хугацаанаас хойш гарсан болон тоонд багтаж ваучер авсан ч нас барсан ахмадууд яах юм гэдэг асуултууд манайд маш их ирж байгаа. Энэ асуудлууд бол “Эрдэнэс монгол”, Монгол банк, Хөдөлмөр нийгмийн хамгааллын яам зохион байгууллалтынхаа хүрээнд шийдэх асуудлууд. Бидэнд одоогоор мэдээлэл байхгүй байна.


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх

  • Чука / 2021 04 сар 24/

    Ямар нэгэн шалтаг шалтгаан тоочихгүйгээр хугацаанд нь олгох хэрэгтэй.

    Хариулах
  • Зочин / 2021 04 сар 19/

    Шударга шийдэл байх хэрэгтэй.2019 оны 12 сарын 31Нд байсан л бол нас барсан байлаа ч олгох энэ өдгөөс хойш тэтгэвэрт орсон бол үл олгох болно.

    Хариулах