Монгол түмэндээ зориулав.


Шуурхай мэдээ

Төрийн албаны зөвлөл гэж байна уу !!!

Нийтэлсэн: Монгол Хүү | Нийгэм
2021 03 сар 04 ・ 198

-Үүнээс гадна төрийн албанд бугшсан хууль бус зүйлтэй тэмцэхгүй байгаа Төрийн албаны зөвлөлийн дарга Б.Баатарзоригт ч анхаарах цаг нь болсныг харуулсан хэрэг юм-

Шадар сайдын багцад хамаарах Стандарт, хэмжил зүйн газрын түр дарга  Б.Билгүүн гэгч нөхрийн хууль бус ажиллагааг Монгол Улсын Засгийн газар, түүнийг хамаарах үе үеийн Шадар сайд нар хаацайлж ирлээ. Бүхэл бүтэн 600 гаруй хоног, хоёр жил шахам хууль зөрчиж байгааг анзаарч харж байгаа засаг төр гэж байна уу. Тодотговол, түүнийг анх Шадар сайд Ө.Энхтүвшин хууль бусаар томилж, дараагийн Шадар сайд Я.Содбаатар хууль бус үйл ажиллагааг нь дэмжсээр ирсэн гэхэд хэтийдсэн хэрэг болохгүй. Ийнхүү өдгөө гурав дахь Шадар сайдынхаа нүүрийг үзэж байгаа “Түр дарга” Б.Билгүүн хууль зөрчсөөр байгааг шинэхэн сайд, дарга нар нь мэддэггүй бололтой. Түр даргын ажиллах хугацаа 2020 оны арванхоёрдугаар сарын 31-нээр дууссан боловч тэрээр одоо ч ажиллаж хууль бус шийдвэр гаргасаар байхад зогсоох үүрэгтэй Төрийн албаны зөвлөл таг чимээгүй.

Б.Билгүүн гэх “Түр дарга”-ын хууль, тогтоол зөрчсөн тухайд өнгөрөгч оноос төрийн шударга албан хаагчид удаа дараа шаардлага тавилаа. Сүүлдээ Стандарт, хэмжил зүйн газарт ажиллаж байсан үе үеийн алба хаагчид, иргэний нийгмийн төлөөллүүд нэгдэн, “Стандарт, хэмжилзүйн салбарын шинэчлэлийн түр хороо“-г  байгууллаа. “Түр хороо”-ны хуралдааны баримт, тэмдэглэлээс харахад агентлаг толгойлж, алба хаших нь бүү хэл хариуцлага хүлээх учиртай нэгэн ийн дураар дургиж суугаа нь өөрийн эрхгүй анхаарал татав. Тиймээс тэдний дэлгэсэн баримтад тулгуурлан үүнийг хүргэж байна. Хэнээс, хаанаас өгсөн хэмжээлшгүй эрх болохоор ийн засаг төргүй мэт аашилна вэ. Б.Баатарзориг даргатай Төрийн албаны зөвлөл гэж нэг байгууллага байна уу. Төрийн нэг чухал агентлагт хууль зөрчсөн үйлдэл удаа дараа давтагдаж байхад шалгах хянах үүрэгтэй хууль, хүчний байгууллага гэж байна уу. Юу болж байна вэ. Тэр тусмаа Төрийн албаны зөвлөл ажлаа хийхгүй байна. Гэтэл Шадар сайд асан Ө.Энхтүвшин, Я.Содбаатар нарын үед дураараа дургиж байсан “Түр дарга” Б.Билгүүн өдгөө С.Амарсайханы үед ч хууль зөрчинө гэдгээ үйлдлээрээ харуулж эхэллээ.

Тэрээр урьд өмнө нь Газрын тосны газарт хамт ажиллаж байсан О.Оюунтуяа, тус агентлагийн Хяналт,шинжилгээний газрын дарга Б.Ууганбаярын найз Б.Эрхүү нарыг хоёр жил гаруй хууль бусаар авч ажиллуулан, татвар төлөгчдийн олон арван сая төгрөгийг үргүй зарцуулж байсныг Төрийн албаны зөвлөлөөс шалгаж тогтоосон тул Б.Билгүүн арга буюу үнэнд гүйцэтгэж эдгээр ажилтнуудыг арванхоёрдугаар сарын 31-нээр тасалбар болгон халсан тухайгаа 2021 оны нэгдүгээр сарын 22-ны өдрийн 01/53 тоотоор Төрийн албанны зөвлөлд албан ёсоор мэдэгдсэн байна. Гэвч энэ тушаал Б.Билгүүний зүгээс Төрийн албаны зөвлөл, Шадар сайдыг хуурсан ээлжит молиго байсныг түүний гаргасан дараагийн тушаал шийдвэрүүд гэрчилж байна. Тэрээр 2021 оны нэгдүгээр сарын 14-ний өдрийн Б/08 тоот тушаал гаргаж Б.Эрхүүг Эрх зүйн асуудал хариуцсан мэргэжилтний албан тушаалд мөн л урьдын адил буцаан томилж цалинг ТЗ-6-2 ангиллаар 2021 оны нэгдүгээр сарын 04-ний өдрөөс ажиллуулахаар тушаал гаргасан байна. Өөрөөр хэлбэл төрийн албаны тангараг өргөөгүй хууль зөрчин томилогдсон Б.Эрхүүг буцаагаад ажилд нь томилсон гэсэн үг. Б.Билгүүн Төрийн албаны зөвлөлийн дарга Б.Баатарзоригийн өмнөөс гаргаж буй буй ээлжит салаавч гэлтэй. Гэтэл Б.Баатарзориг нь мэдээгүй мэт л сууна. Монголын Төрийн албаны зөвлөл ингэж доошоо орсон аж.

Мөнхүү 2021 оны хоёрдугаар сарын 9-ний өдөр А/14 тоот тушаал гарган зөвхөн тангараг өргөсөн төрийн жинхэнэ албан хаагчдад жилийн ажлын үр дүнгээр олгодог шатлалыг Б.Эрхүүд 14 хоногийн дараа нэмэгдүүлэн ТЗ-6-3 болгон цалинг нэмжээ. Ийнхүү хууль зөрчин томилогдсон этгээд халагдах биш цалингаа нэмүүлээд төрийн албанд хувилз шиг шигдээд байгаа нь шудар ёс мөн үү.  Ийнхүү хууль зөрчсөн томилгоо нь хэл ам дагуулахаар Б.Эрхүүг чөлөөлсөн гэж Төрийн албаны зөвлөл, Шадар сайдад худал мэдүүлэн, тэднийг хууран, эргүүлэн томилж улмаар цалинг нь нэмсэн байна. Мөнхүү “Түр дарга” нь тус газрын хэвлэл мэдээлэл, олон нийттэй харилцах албаны ажилтнаар Б.Амарсайхан гэгчийг 2020 оны арванхоёрдугаар сарын 1-ний өдөр томилоод 2021 оны хоёрдугаар сарын 1-ний өдөр чөлөөлжээ. Учир нь Б.Амарсайхан гэгч нь хоёр сарын хугацаанд ажилдаа ирээгүйгээс гадна түүнийг үзсэн харсан албан хаагч нэг ч байхгүй гэдгийг байгууллагын нэг нэгжид харъяалагддаг алба хаагчид батлан хэлсэн. Ийнхүү байгууллага дотор асуудал дэгдэхээр нь ажилдаа ирээгүй хүнийг хоёр сар цалинжуулаад  ажлаас нь чөлөөлсөн болж  аргалжээ. Төрийн алба бол тоглоом биш. Нөгөө талаар дуртай нэгнээ томилж, хэн дуртайдаа цалин өгч байдаг хувийн хэвшлийн байгууллага ч биш. Энэ бүхнийг зохицуулж, хянах үүрэгтэй Төрийн албаны зөвлөл ажлаа хийхгүй байна. Үүнээс гадна төрийн албанд бугшсан хууль бус зүйлтэй тэмцэхгүй байгаа Төрийн албаны зөвлөлийн дарга Б.Баатарзоригт ч анхаарах цаг нь болсныг харуулсан хэрэг юм.

 

Түмэн.мн


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх