Монгол түмэндээ зориулав.


Шуурхай мэдээ

Хугацаагүй хадгаламжид хүү тооцохгүй байх хуулийн заалт хэрэгжиж эхлэв

Нийтэлсэн: Монгол Хүү | Нийгэм
2021 02 сар 23 ・ 87

Энэ оны 1 дүгээр сарын 1-нээс банкууд хугацаатай хадгаламжийн хүүгээ 1-3 хувиар бууруулж, хугацаагүй хадгаламжийн хүүг энэ сараас 07 сарын 1-н хүртэл тэглэсэн.

Төгрөгийн хадгаламж энэ оны 1 дүгээр сарын эцэст 13.6 их наяд төгрөг болж, өмнөх сараас 218.1 тэрбум төгрөгөөр, өмнөх оны мөн үеэс 2.8 их наяд төгрөгөөр өсжээ. 89.4 хувь нь иргэдийн хадгаламж, 10.6 хувь нь аж ахуйн нэгж, байгууллагынх. Харин зээлийн мэдээллээр нийт олгосон зээлийн 5.9 хувийг хадгаламж, данс барьцаалсан зээл эзэлж байгаа юм.

Коронавируст халдвар /ковид-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн 10.4-т Цар тахлын үед банкны хугацаагүй хадгаламж, харилцах дансанд хүү тооцохгүй гэх заалт хэрэгжиж эхлэв. Гэсэн ч зарим иргэд мэдээлэлгүйгээс гадна, банкууд ч албан ёсны сайтдаа энэ талаар мэдээлэл гаргаагүй байгаа тул үүнтэй холбоотой асууж тодруулсан юм. Мэдээж хэрэг банкуудад ашигтай тул аль хэдийн хэрэгжүүлээд эхэлсэн. Гэхдээ өдрүүд нь харилцан адилгүй байсан юм. Тухайлбал, Хаан банк энгийн хугацаагүй хадгаламжид жилийн эцэст 4.5 хувийн хүү тооцож олгодог байсан бөгөөд 1 дүгээр сарын 29-нөөс өмнөх хугацааны хүүг тооцож олгох аж. Харин Голомт банк энэ сарын 22-ноос өмнөх хугацаагүй хадгаламжийн хүүг тооцох юм байна.

Энгийн хугацаагүй хадгаламжийг сонгохдоо иргэд тэтгэврийн болон цалингийн картны орлого, зарлагын гүйлгээ хийдэг төрлийг сонгодог талаар банкны мэдээллийн ажилтнууд хэлж байв.

Харин энэ оны 1 дүгээр сарын нэгнээс банкууд хугацаатай хадгаламжийн хүүгээ бууруулсан бөгөөд мөн л харилцан адилгүй.

Жишээ нь, хамгийн өргөн хэрэглээтэй хүүхдийн мөнгөний хадгаламжийн хүү Төрийн банкинд 10.4 хувьтай байсан бол Худалдаа хөгжлийн банк 10.5 хувь, Голомт банк 10.1 хувь, Хаан банк 10 зэрэг 1-5 хувийн хэлбэлзэлтэй. Мэдээж хадгаламжийн төрлөөсөө шалтгаалаад өөр өөр.

Сонирхуулахад, Монгол банкнаас ковидтой холбоотойгоор 2020 оны 4 дүгээр сарын 29-нөөс харилцах дансны үлдэгдэлд хүү тооцохыг зогсоосон.  Энэхүү арга хэмжээг харилцах дансыг хугацаагүй хадгаламжид хөрвүүлэхээс зайлсхийж, банкууд мөрдөж хэрэгжүүлнэ гэж байсан билээ.


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй