Монгол түмэндээ зориулав.


Шуурхай мэдээ

Эрдэнэтийн захирал Х.Бадамсүрэн ичих ч үгүй худал ярив

Нийтэлсэн: Монгол Хүү | Нийгэм
2019 06 сар 17 ・ 274

Төр засгийн болон төрийн өмчит үйлдвэрийн газрын дарга нар сүүлийн үед ихээхэн эргэлзээтэй, заримдаа бүр эрээ цээргүй худал зүйл ярьдаг болоод байна. Саяхан Эрдэнэт үйлдвэрийн захирал Х.Бадамсүрэн УИХ-ын Аюулгүй байдал, гадаад бодлогын байнгын хорооны хуралд уригдаж оролцох үедээ өөрийнхөө цалин хангамж болон хэвлэл мэдээллийн хэрэгслээр шуугиан тариад байгаа Зайсан дахь өндөр үнэтэй хаус байруудыг худалдаж авсан талаар гишүүдийн асуултанд хариулсанаас харахад төрийн түшээд, түмэн олноо хэтэрхий басамжлав уу гэлтэй. Тэрбээр Б.Бат-Эрдэнэ гишүүний тэрхүү асуултын хариуд “Байр байшин, хаус худалдаж авсан асуудал байхгүй. Би үйлдвэрийн ажилчдын байранд амьдардаг. Цалин хөлсний тухайд надад гурван сая төгрөгийн цалин өгч байгаа. Өмнө нь Эрдэнэт үйлдвэрийн ерөнхий захирлаар ажиллаж байсан хүмүүсийн Орос, Монгол нь ялгаагүй, мөн ерөнхий захирлын орлогчоор ажиллаж байсан хүмүүст 4-5 өрөө байрыг үйлдвэрийн үйл ажиллагааны  үр дүнтэй холбогдуулж Улаанбаатарт олгож байсан юм билээ. Орос захирлуудын тухайд Москвад байр олгож байсан” гэжээ.

Тэгвэл Х.Бадамсүрэн нь МАН-ынхаа эрх баригчдын дэмжлэгээр Эрдэнэтийн захирлаар томилогдоод удаагүй байхдаа Төрийн өмчийн бодлого, зохицуулалтын газарт хандан өөрийн цалин хангамж зэрэг нийт 14  төрлийн санал, хүсэлтийг үйлдвэрийнхээ ТУЗ-өөр дамжуулан өгсөн байв. Тухайн үед Төрийн өмчийн бодлого, зохицуулалтын газрын даргаар ажиллаж байсан Ц.Ням-Осор харин энэ тухай мэдээлэл хийхдээ “Манайд ирүүлсэн төсөлд 14 нөхцөл тусгагдсан байсан. Захирлынх нь цалинг 10 мянган ам.доллараар тогтохыг би зөвшөөрсөн нь үнэн. Дэлхийн хэмжээний үйлдвэрийг удирддаг захирлын цалин ийм байх нь зөв гэж үзсэн. Харин жил бүр амралтаа эдлэхэд нь олгох цалинг гурав дахин нэмэгдүүлсэнтэй тэмцэх хэмжээний буюу 30 мянган ам.доллар болгож өгөх саналыг дэмжээгүй.  Мөн би эмчилгээнд зарцуулах зардлыг өгдөг байсныг болиулсан. Бас жилд нэг удаа гэр бүлийн гишүүний хамт амрах, аялах зардлыг даах саналыг зөвшөөрөөгүй. Нэг хүүхдийг нь гадаадад сургах зардлыг үйлдвэр даана гэсэн саналаас би бас татгалзсан” гэсэн юм.

Харин Төрийн өмчийн бодлого зохицуулалтын газрын 2016 оны 8 дугаар сарын 19-ны өдрийн 1/10 тоот албан бичгийн хавсралтанд  гүйцэтгэх захирал, дэд захирлын цалинг  тус бүр 10 сая төгрөгөөр тооцсон байлаа. Ухаандаа цалингийн талаар иймэрхүү хоёр гурван янзын зөрүүтэй албан мэдээллүүд  байгаа хэдий ч доод тал нь 10 сая төгрөгийн цалин дээр л бууж байна.

Мөн “Эрдэнэт” Төрийн өмчит үйлдвэрийн газрын удирдлагууд Зайсан дахь “Жарден” хотхоны 202, 302 тоот петхаусуудыг 2017 оны 8 дугаар сард 4.7 тэрбум төгрөгөөр худалдаж аван, Х.Бадамсүрэн захирал нь тэнд амьдрах гэснээ олны хэл амнаас болгоомжлоод үйлдвэрийнхээ дансанд өнөөг хүртэл дарж суугаа нь яалт ч үгүй үнэний ортой ажээ. Гэтэл УИХ-ын байнгын хорооны дээрх хурлын үеэр мань хүн ер тоосон шинжгүй,  тас гүрийгээд гарсан байх юм.

Х.Бадамсүрэн “Эрдэнэт”-ийн захирал болсон даруйдаа анхны тушаалаараа 300 сая төгрөгийн үнэтэй LEXUS 570  маркийн автомашин худалдан авсныхаа дараахан өөрийнхөө байрыг 180 сая төгрөгөөр засаж тохижуулсан талаар хэвлэлүүд ид шуугиж байх үед тийнхүү тансаг зэрэглэлийн хаусуудыг 4.7 тэрбумаар авсан нь 2018 оны баримтын шалгалтаар ил болсон юм билээ.  Өдгөө уг хаусуудад айл ороогүй, цоожтой хэвээрээ байгаа бөгөөд ийм шахааны бизнесийг таслан зогсоох талаар шалгалтын актанд дурьдсан боловч харамсалтай нь Х.Бадамсүрэн тэргүүтнүүд  үл тоож байгаа ажээ. Гэтэл мань хүн УИХ-ын байнгын хорооны хуралдаан дээр ичих ч үгүй худлаа яриад гарч явсан байлаа. Худал ярих муухай л даа.

О.Баяр

Түмэн.мн  


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх