Монгол түмэндээ зориулав.


Шуурхай мэдээ

“Бандааш” хочит Д.Гантулгын хөлд чирэгдсэн гурван шинжээчийн хэрэг удахгүй шүүхэд шилжинэ

Нийтэлсэн: Монгол Хүү | Нийгэм
2019 04 сар 11 ・ 1026

Шүүүхийн шинжилгээний үндэсний хүрээлэнгийн зарим удирдлага,  шинжээч нарын хэргүүд сүүлийн үед ар араасаа шил даран илэрсээр байна. Нөгөө дуулиан шуугиантай Салхитын мөнгөний ордыг булаацалдсан Хятадын компанийн эздэд  үйлчилсэн Монголын хууль хяналтынхны хатгаасаар хуурамч дүгнэлт гаргасан болон өөр бусад хэргүүд дээр шинжээчээр ажиллахдаа худал хуурмаг дүгнэлт гаргасан Криминалистикийн шинжилгээний газрын дарга Д.Адилбаяр, шинжээч Ж.Тамир, ахлах шинжээч  Э.Солонго, С.Сэлэнгэ зэрэг шинжээчдийн хэргүүд удахгүй шүүх рүү шилжих ажээ.

Тэгвэл олон түмний  дунд “Бандааш” гэдэг тун эвгүй хоч нэрийг зүүж яваа УИХ-ын гишүүн асан Д.Гантулгын хүчингийн хэргийг хуурамч дүгнэлтээр булзааруулах гэж оролдсон Шүүхийн шинжилгээний үндэсний хүрээлэнгийн шинжээч М.Золжаргал, тус хүрээлэнгийн тусгай шинжилгээний газрын дарга Х.Түвшин-Эрдэнэ, ахлах шинжээч Ж.Оюун нарт Авлигатай тэмцэх газраас  яллах дүгнэлт гарган шүүхэд шилжүүлэх саналтайгаар Нийслэлийн прокурорт хэргийг нь шилжүүлсэн байна.

Д.Гантулга нь 2017 онд буюу УИХ-ын гишүүн байхдаа “Н” гэдэг бүсгүйн гэрт өөр нэг эмэгтэй найзыгаа дагуулан очиж хонохдоо “Н”-ыг хүчиндсэн хэрэгт холбогдон шалгагдаж эхэлсэн билээ.  Түүний энэ хэргийг Баянзүрх дүүргийн Эрүүгийн хэргийн анхан шатны шүүх хэлэлцээд нэмэлт мөрдөн байцаалтанд буцаасан байдаг. Харин энэ хугацаанд Д.Гантулга нь дахин ийм шившигтэй хэрэгт орооцолдон Хан-Уул дүүргийн цагдаагийн хэлтэст шалгуулж байна.

Хүчирхийлэлд өртөж бие болоод сэтгэл санаагаар хохирсон “Н”-ийн гомдолын дагуу анх Баянзүрх дүүргийн Цагдаагийн нэгдүгээр хэлтсийнхэн хэргийг шалгаад “Д.Гантулга гэмт хэрэг үйлдсэн нь тогтоогдоогүй” хэмээн хэргийг нь хаасан байлаа. Гэвч муу юм модон улаатай гэгчээр түүний шинжээч нартай хуйвалдсан хэрэг удалгүй Сүхбаатар дүүргийн Цагдаагийн нэгдүгээр хэлтэст шалгагдаж, дээрх гурван шинжээчийн гэм буруутай үйлдлүүд нотлогдож эхэлжээ.  Хохирогч “Н”-ийн өмгөөлөгчдийн зүгээс ч мөн АТГ-т хандан “Д.Гантулга нь цагдаа, шинжээч нартай илэрхий хуйвалдаж, хүчингийн хэргээс гадна нотлох баримт устгах, хавтаст хэрэгт хуурамч дүгнэлт оруулах зэрэг гэмт хэргийг бүлэглэн үйлдсэн” гэж гомдол гаргасан юм. Тэгээд Д.Гантулгын  хэргийг сэргээн шалгах хүсэлтийг УЕПГ-т тавьж дахин шалгуулсны дүнд тийнхүү шүүхийн шинжилгээний шинжээч нарыг яллагдагчаар тооцжээ.

Д.Гантулгын үйлдсэн хүчингийн хэргийн улмаас 2017 оны 6 дугаар сарын 19-ны өдөр анх Шүүхийн шинжилгээний үндсэний хүрээлэнгийн байранд хохирогч “Н”-ээс үтрээний арчидас, дэр, ор хөнжлийн даавуунд үлдсэн наалдац зэрэгт шинжилгээ хийсэн тэдгээр шинжээчид нь үгсэн хуйвалдаж “...эр бэлгийн эс, үрийн шингэн илрээгүй...” гэсэн хуурамч дүгнэлт гаргасан байв.  Тийнхүү шинжээчид нь Д.Гантулгын хүчингийн хэрэг хийснийг батлах гол баримт болох ор хөнжлийн даавуу, хохирогч эмэгтэйн дотуур хувцас зэргээс шинжилгээний дээж болгож авсан эд мөрийн баримтуудын заримыг  урж тасалж, угааж арчаад хэргийн ул мөрийг баллах гэж оролдож байжээ.

Одоогийн мөрдөж буй Эрүүгийн хуулийн 21.4-т шинжээч зориуд худалд дүгнэлт гаргасан бол нэг жилээс таван жл хүртэл хугацаагаар эрх хасаж, таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар  зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэхээр заасан байдаг.  Иймд “Бандааш” хочит Д.Гантулгын хөлд чирэгдсэн дээрх гурван шинжээчийн хэрэг удахгүй шүүхэд шилжих нь  нэгэнт тодорхой бөгөөд тэдний гэм буруутай нь нотлогдвол иймэрхүү л ял сонсох ажээ. 

О.Баяр

Эх сурвалж: Түмэн.мн


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх