Монгол түмэндээ зориулав.


Шуурхай мэдээ

“Бид хоёр ийм шуналтай хүүхэд төрүүлсэндээ харамсч байна”

Нийтэлсэн: Монгол Хүү | Нийгэм
2015 05 сар 14 ・ 33083

УИХ-ын гишүүн Сү.Батболдын аав ээж хоёрын хүүдээ хандаж хэлсэн энэ үгээр гарчигаа зүгээр ч нэг нэрлэсэнгүй.

Учир нь манай өнөөгийн энэ эрх мэдэлтнүүдэд, улс төрчддөд, улс төрчид ч гэж дээ, жижиг тугалын бэлчээрээс холдож үзээгүй, жирэмсэн эмийн шээх газраас цааш сэтгэж чадахгүй нөхдүүдийг улс төрчид гэж нэрлэх нь өнөө “Итгэлт баяны хэлдгээр ичмээр дамшиг даа” гэдэг шиг нөхдүүдэд ингээд хэлчих Монгол аав ээж, ах дүүс, үр хүүхэд байж л байгаа.

Хэн нэгнийг бизнес хийж хөрөнгө мөнгөтэй болохыг нь хэн ч хориогүй, тэрч  битгий хэл манай хууль, эрх зүйн орчин үүнийг чинь хөхүүлэн дэмжсээр байна. Харин төрийн төсөв, хөрөнгө мөнгө буюу ард иргэдийнхээ хөрөнгө мөнгө, баялагийг албан тушаал эрх мэдлээ ашиглан луйвардаж, ховх сорон, хагартлаа баяжихаа болиочээ гэж л олон түмэн хүсч байна.

Өнгөрсөн даваа гарагт нэгэн масктай нөхөр “Цензургүй яриа” телевизийн нэвтрүүлэгт оролцож ардчилалд шилжснээс хойших монголын улс төрийн 25 жилийн амьдралд болж байсан, болсоор байгаа үйл явдлуудын тухай, тэнд тоглож ирсэн тоотой хэдэн эрх мэдэлтнүүдийн үнэн дүр төрхийг илчилсэн, тэдний баг, маскийг хуулж, хэн болохыг нь харуулсан маш ноцтой баримт, мэдээллийг сонгогч олон түмэнд дэлгэн тавьлаа. Үүнд:

... “2004 онд Таван толгой ордын 80%-ийн лицензийг эзэмшиж байсан өнөөгийн УИХ-ын гишүүн Сү. Батболд, 20%-ийнх эзэн Майнинг компаний Батсайхан болон түүний ард байсан өнөөгийн Монгол улсын сайд, өнөөдрийн Таван толгойн гэрээ хэлэлцээрийг удирдаж байгаа М.Энхсайхан нар Хятадын Шинхуад өөрсдийн эзэмшлийн эрхээ 350 сая ам доллараар зарж, “Энержи Ресурс”-т багтаж байсан компаниуд мөнгөө хувааж авах тохиролцоог аль хэдийнээ хийчихсэн байсан”

... “Тодруулбал, Энержи ресурст багтаж байсан 14 компанийнхан М.Энхболдод саад хийсэн гэсэн үг. Тэнд чинь АПУ, Шунхлай, П.Очирбат, Молекул Б.Батбаяр, Ц.Цэнгэл, Б.Бадамжунай гээд бүгд л багтаж байгаа. П.Очирбатын хувьд Сү.Батболдыг өөргүйгээр нь Тавантолгойг ашиглаж чадахгүй гэж дарамталж байж хувиа авсан байдаг юм”

... “Н.Энхбаяр Сү. Батболдтой Таван толгойг 49:51 гэсэн харьцаагаар хувааж авах сонирхолтой байсан боловч тохиролцоонд хүрч чадаагүй”

... “Ухаа худаг бол 480 сая тонн нүүрсний нөөцтэй. Энэ нь 4.5 тэрбум ам.доллар гэсэн үг. Нөөцийнх нь 80 хувь нь коксжих нүүрс байдаг. 5-35 метрийн хөрс хуулаад л нүүрсэндээ ордог энэ хэсгийг Энержи ресурст өгөх шаардлага байгаагүй”

... “Ухаа худагийг “Энержи ресурс”-т өгснийхөө төлөө С.Баяр намынхаа сонгуулийн санхүүжилтийг олж авч, өөрөө ч тодорхой хувь хүртсэн. Оюутолгойн гэрээг байгуулж хэрхэн хувь хүртсэн нь тодорхой болж байгаа шиг л С.Баяр Тавантолгойгоос ч хувь хүртсэн шүү дээ”

... “Оюутолгойн Хөрөнгө оруулалтын гэрээг батлах үед С.Баяр, Ц.Элбэгдорж хоёрын хооронд томоохон тохиролцоо хийгдсэн юм шиг байгаа юм. Оюутолгойн гэрээн дээр МАН ба С.Баяр эрх ашгаа шингээе, Тавантолгойн гэрээг хийхэд АН ба Ц.Элбэгдорж эрх ашгаа шингээе гэж”

... “Ц.Элбэгдорж Н.Алтанхуягийг энэ асуудлыг шийдэхийг шахсан ч мань хүн хөдлөөгүй. Тэгэхээр нь Ерөнхийлөгч дан, давхар дээлний асуудлыг хөндсөнөөр Засгийн газрыг нь унагасан. Үүнийг ч Н.Алтанхуяг хожим нь ярьсан байсан. Одоо Ерөнхийлөгч Ч.Сайханбилэгийг дарамталж Тавантолгойг хөдөлгөх гэж байна”

... “АТГ-ыг ерөнхийдөө Ерөнхийлөгч л удирдаж байгаа шүү дээ. Түүний саналаар л дарга нарыг нь томилдог биз дээ. Ч.Сайханбилэгийн Засгийн газрын үед Тавантолгойн гэрээг УИХ-аар оруулахгүйгээр шийдчихнэ гэж үзсэний үндсэн дээр эрхэм Ерөнхийлөгч маань Худалдаа хөгжлийн банкны 5.5 хувийг худалдаад авчихсан байна гэж би харж байгаа”

... “Өнөөдөр манай хууль зүйн системийн тогтолцооноос айж явахгүй бол болохгүй. Хуулийн хамгаалалт маш муу. АТГ-аас хөрөнгө орлогын мэдүүлэг авч байгаа байдал нь маш бүдүүлэг. С.Баяр шалгуулна гээд байгаа нь “Тийм асуудал байхгүй юм байна” гэсэн мэдээлэл өгүүлэх зорилготой. Маш олон улстөрч ч С.Баярын санаснаар бүх зүйл болоосой гэж хүсч байгаа. Яагаад гэвэл тэд ч гэсэн С.Баярын зам мөрөөр замнах гээд байна шүү дээ” хэмээн “Масктай хүн” ярьж байна.

Энэ бол “масктай хүн”-ий хэлж ярьсан манай эрх мэдэлтнүүдтэй холбоотой ноцтой баримт, мэдээллийн өчүүхэн хэсэг нь. Ийм ноцтой баримт дэлгэснийхээ төлөө, ийм баримт олж авсныхаа төлөө өнөөдөр дэлхий олон оронд маш олон шударга сурвалжлагчид болон түүний баталгаатай эх сурвалжууд амь насаа бусдын гарт алдсаар байна.

Гэтэл та бид өнөөдөр энэ масктай нөхрийг хэн болохыг олж таах гэж, хэлсэн ярьсныг нь үнэн худал гэж өнөө дээр хэлдэг шиг шээсний газраасаа цааш харж чадахгүй ойр зуурын асуудлаар хөөцөлдөж байх зуур юу ч болж мэдээ билээ.

Энэ мэдээлэл олон түмэнд ил тод болсноос хойш өнөөдрийг хүртэл дээрхи ноцтой мэдээлэлд нэр холбогдсон хэн нэгэн эрх мэдэлтэн ямар нэгэн байдлаар тайлбар хийж, биеэ өмөөрч, хамгаалсан үйлдэл гаргасангүй. Тэр битгий хэл өнөө хайртай “Нэр төр, алдар хүнд”-ээ доромжлуулж, гүтгүүллээ хэмээн матрын нулимс унагаагүй л байна.

Гэхдээ тэд өнөө ч гэсэн маш их эрх мэдэлтэй, хөрөнгө мөнгөтэй байгаагаас гадна хэдэн тэрбум долларын ашиг сонирхол нь хөндөгдөж байгаа ийм тохиолдолд юу ч хийхээс буцахгүй болчихсон байгаа гэдэгт эргэлзэхгүй байна.

Энэ тохиолдолд сурвалжлагч та бид харин энэхүү үнэ цэнэтэй эх сурвалжийн амь насны аюулгүй байдлын талаар санаа тавьж, бүх талаар хамгаалж, хамгаалалтад авах, байгаа боломж, бололцооныхоо хэрээр эрх мэдэлтнүүдийн гар хөлд нэрвүүлчихгүй байх талаар санаа нэгдэж, санаачлага гаргах, эв нэгдэлтэй байх ёстой хэмээн мунхаг би бодно.

Учир нь манай өнөөгийн хууль хяналтын байгууллагад тодорхой хэн нэгэн этгээд энэ мэт ноцтой баримт мэдээллээр өргөдөл гомдол, нэхэмжлэл тусгайлан гаргаагүй тохиолдолд тухайн чиглэлийн мөрдөн шалгаж, үнэн мөнийг тогтоох ёстой төрийн байгууллага нь өөрийн идэвхи санаачлагаар иймэрхүү асуудалд хэрэг үүсгэн шалгах эрх үүрэггүй байдаг тухай УИХ-ын гишүүн, хуульч О.Баасанхүү хэлж байна. Энэ талаар энэ хүн сайн мэдэж байгаа. Хэн нэгэн заавал тусгайлан өргөдөл, гомдол, нэхэмжлэл гаргах ёстой. Маш хачирхалтай, сонин хууль байгаа биз. Өнөө эрх мэдэлтнүүдийн баталсан хууль.

Г.Чугаа

Эх сурвалж: www.TODAY.mn

Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй