Монгол түмэндээ зориулав.


Шуурхай мэдээ

М.Мөнхшүр:Нас барсны гэрчилгээ, буяны компанийн бичиг баримтыг хуурамчаар үйлдэж, зарж байсан этгээдүүдийг илрүүллээ

Нийтэлсэн: Монгол Хүү | Нийгэм
2020 11 сар 24 ・ 187

Гамшгаас хамгаалах Бүх нийтийн бэлэн байдлын зэрэгт шилжсэн энэ өдрүүдэд олон нийтийн сүлжээгээр дамжин гарч буй гэмт хэрэг зөрчлийг Эрүүгийн цагдаагийн алба шалган ажиллаж байна.

Уг ажлын хүрээнд фэйсбүүк хуудсанд “Хөдөө орон нутгаас хотод ирээд гацагсад холбоо барина уу” гэх зарыг байршуулан иргэдийг залилан мэхэлж байсан 35 настай Б, 33 настай У нарыг Булган аймгийн цагдаагийн газартай хамтран илрүүлж, таслан зогсоожээ.

Энэ талаар Цагдаагийн ерөнхий газрын хэвлэлийн төлөөлөгч, цагдаагийн ахмад М.Мөнхшүр “Тухайн этгээдүүд “Хөдөө орон нутгаас хотод ирээд гацагсад холбоо барина уу” зарыг байршуулж, нас барсны гэрчилгээ, буяны компанийн бичиг баримтыг хуурамчаар үйлдэж иргэдийг залилан, иргэдээс тус бүр 250 мянган төгрөг авдаг гэдгийг урьдчилсан байдлаар мэдүүлж байна.

Тухайн этгээдүүдэд Монгол Улсын Эрүүгийн хуулийн тусгай ангийн 17.1, Эрүүгийн хуулийн 23.2-т зааснаар эрүүгийн хариуцлага хүлээлгэнэ. 35 настай иргэн Б нь Сүхбаатар дүүргийн цагдаагийн нэгдүгээр хэлтэст залилах гэмт хэргийн яллагдагчаар татагдаж, шалгагдаж байх хугацаандаа дахин гэмт хэрэг зөрчилд холбогдсон нөхцөл байдал тогтоогдсон тул Эрүүгийн цагдаагийн албанд шалгалтын ажил үргэлжилж байна. Иймд иргэд та бүхэн УОК болон Засгийн газраас гаргасан шийдвэрийг мөрдөж хэрэгжүүлэх, баталгаатай эх сурвалжийн мэдээ мэдээллийг авдаг байх, гэмт хэргийн хохирогч болохоос урьдчилан сэргийлэхийг Цагдаагийн байгууллагаас анхааруулж байна” гэж мэдэгдлээ.


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй