Монгол түмэндээ зориулав.


Шуурхай мэдээ

УИХ-ЫН ГИШҮҮН Н.НАРАНБААТАР ӨМНӨГОВИЙН ЗАСАГ ДАРГА БАЙХДАА ТӨСВИЙН ХӨРӨНГӨӨР 140 МАШИН ХУДАЛДАН АВЧЭЭ

Нийтэлсэн: Монгол Хүү | Улстөр
2020 10 сар 21 ・ 349

(АТГ-ын Мөрдөн шалгах хэлтэст сонордуулах нь)

 Өмнөговь аймгийн засаг дарга Н.Наранбаатар 2020 оны УИХ-ын сонгуульд нэр дэвшиж, улмаар төрийн түшээ болсны дараа тэрбээр аймгийн төсвийг хэрхэн үрэн таран хийж байсан баримтууд ар араасаа хөвөрсөөр байна. Н.Наранбаатар аймгийн засаг ноён байх дөрвөн жилийнхээ хугацаанд сум орон нутагтаа нүдэнд харагдах, гарт баригдах ямар ч бүтээн байгуулалт, том төсөв хөтөлбөр хэрэгжүүлээгүйг бид мэднэ. Гэтэл цаагуураа Н.Наранбаатар төсвийн хөрөнгөөр гараа угааж, хууль дүрэмгүй мэт дураараа дургиж дунд чөмгөөрөө жиргэж явжээ. Дөнгөж засаг дарга болсныхоо дараа тэрбээр 2016 онд А-875 тоот захирамж гарган “Төрийн зарим байгууллагад автомашин худалдан авах”-д 120 сая төгрөгийг төсвийн хөрөнгөнөөс сугалжээ. Цааш ноцтой баримт дурьдвал Засаг дарга Н.Наранбаатар нь 2017 онд А-344 захирамжаар аймгийн авто тээврийн төвд 32,9 сая төгрөгөөр УАЗ-2206 микро автомашин худалдан авахдаа өөрийн хамаарал бүхий “Элсний хүч” ХХК Б.Эрдэнэсанд ханджээ. Солонгосоос орж ирсэн микро автобус хамгийн дээд үнэ нь 12-15 сая, 2017 онд үйлдвэрлэсэн цоо шинэ УАЗ пургон машин л дээд ханш 25 сая гэж бодохоор зөрүү мөнгийг нь халааслаад байсан хардлага төрж байгаа юм. Мөн онд аймгийн ЗДТГ-т 97 сая, 202 саяар Ланд-200, 178,3 саяар жийп, 84 саяар дунд гарын жийп, 37,4 сая төгрөгөөр суудлын автомашин худалдан авах А-244, А-260, А-355, А-1458 захирамжийг тус тус гаргаж гүйцэтгэгчээр нь өөрийн хамаарал бүхий найз нөхөд, компаниудыг сонгож байв. Уг нь Аймгийн засаг даргын тамгын газар 2012-2016 онд парк шинэчлэл хийчихсэн, хэдэн сайн машинтай байжээ. Гэвч Засаг дарга Н.Наранбаатар ахиад л төсвийн хөрөнгөөр авто машин худалдан авах захирамж гаргасаар байлаа. Жишээ нь Аймгийн ИТХ-ын Тэргүүлэгчдийн ажлын албанд хүртэл 18 сая төгрөгөөр машин худалдан авч өгчээ. Аймгийн ИТХ-ын тэргүүлэгчид байтугай Даланзадгадын төрийн алба хаагчид дотор машингүй хүн цөөхөн. Амташсан хэрээ арван гурав дахихын үлгэрээр засаг ноён Н.Наранбаатар 2019 онд А-151 тоот захирамжаар тодорхой эзэн, биегүй “Аймгийн төрийн байгууллагад” гэж хаяглаад 176 сая төгрөгөөр бандгар жийп авахуулсан байх юм. Энэ жийпийг мөн л “Элсний хүч”-ийн Б.Эрдэнэсан найз нь худалдан авах ажлыг гүйцэтгэжээ.

 Н.Наранбаатар дөрвөн жилийн хугацаанд 140 машин төсвийн хөрөнгөөр худалдан авсан ноцтой баримтан дунд тун хачирхалтай албан тоот дугааргүй захирамжууд ч байна. 2018 онд тэрбээр “Гэмт хэргээс урьдчилан сэргийлэх зөвлөлийг автомашинаар хангах” гэсэн захирамж гаргаад 35.5 сая, Номгон сумын Гэмт хэргээс урьдчилан сэргийлэх салбар зөвлөлийн унаагаар хангахад 34 сая, нутгийн захиргааны байгууллагын автомашины хэвийн үйл ажиллагааг хангах нэрээр 180 сая, Ханхонгор сумын Гэмт хэргээс урьдчилан сэргийлэх зөвлөлийг унаагаар хангахад 27,4 сая төгрөгийг та бидний татвар төлөгчдийн мөнгөнөөс сугалжээ. Засаг ноён Н.Наранбаатарын төсвийн мөнгөөр машин авах “хоббий” үргэлжилсээр сумын соёлын төвд 483 сая төгрөгийг аймгийн төсвөөс ямар ч тендер, үнэлгээгүй, худалдан авах, худалдан авах гэрээгүй гаргасан байдаг. Мөн прокурорын газарт 15 сая төгрөгөөр автомашин, Хүрмэн сумын ЕБС-д 34,4 сая, ХЦ-ийн 131 дүгээр ангид 32 сая төгрөгөөр автомашин, Тагнуулийн Ерөнхий газрын Өмнөговь аймаг дахь Хилийн тагнуулын тасагт 45 сая төгрөгөөр тус тус машин авч өгсөн гэх. Хамгийн сүүлд Засаг дарга Наранбаатар “Элсний хүч” ХХК Б.Эрдэнэсанд хандаж Цагдаагийн хэлтэст автобусыг 54,6 саяар авах тендергүй захирамж гаргаж өгчээ. Уг нь АИТХ-ын Төлөөлөгчдийн 9\6 дугаар тогтоолын 5 дугаар хавсралтын 82 тоотод аймаг, орон нутагтаа 604 сая төгрөгөөр машин худалдан авахаар баталжээ. Гэвч Н.Наранбаатар дарга 8,544 тэрбум төгрөгөөр дарга даамал, өөрийн хүрээлэлдээ үнэтэй машин худалдан авч өгөөгүй бол аймгийн төсөвт 7,9 тэрбум төгрөг хэмнэгдэх байлаа. Энэ мөнгөөр аймаг суманд хичнээн бага сургууль, цэцэрлэг, эмнэлэг, ажлын байр, засмал зам барьж болох байсныг Өмнөговьчууд та бүхэн бодоод үз! Н.Наранбаатар машин худалдан авах нэрээр дундаас нь олон зуун сая төгрөг зувчуулсан хардлага төрж байгаа тул АТГ-ын “Мөрдөн шалгах хэлтэс”-т хандаж байна. Аймгийн засаг дарга асан Н.Наранбаатар төрийн байгууллагын албан хэрэгцээнд авсан 140 гаруй автомашины худалдан авалт, худалдсан эх үүсвэрийг шалгах, Засгийн газраас гаргасан суудлын автомашины талаар авах зарим арга хэмжээний тухай тогтоол шийдвэрийг ноцтой зөрчсөн, хууль дүрэмгүй мэт төсвийн үрэлгэн байдал зэрэгт хариуцлага тооцохыг хууль хяналтын байгууллагад шаардах болно. Аймгийн засаг дарга Н.Наранбаатарын УИХ-ын гишүүн болсон нь төрийн шоронд дээлээ нөмрөхөө мэдчихээд төрийн ордонд дөрвөн жил нуугдах арга заль байсан юм биш биз!

 

 


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй