Монгол түмэндээ зориулав.


Шуурхай мэдээ

Багшийн цалин нэмэх асуудлаар ЭЦЭГ ЭХЧҮҮД ШИЙДВЭР ГАРГАГЧДЫГ шахаж ажиллана

Нийтэлсэн: Монгол Хүү | Нийгэм
2017 10 сар 02 ・ 215

Багшдаа тусалъя эцэг эхчүүдийн холбооны гишүүд өнөөдөр  БСШУ-ны Үйлдвэрчний холбооны дарга Ж.Батзоригтой уулзаж эцэг эхчүүдийн холбооны үйл ажиллагааг танилцуулж, цаашид хамтран ажиллах чиглэлээр санал солилцлоо.

Энэ үеэр, БСШУ-ны Үйлдвэрчний холбооны дарга Ж.Батзориг, “Эцэг эхчүүд маань ухамсартайгаар эвлэлдэн нэгдэж, багш нарынхаа үйл ажиллагааг дэмжиж байгаа явдалд миний хувьд баяртай байна. Боловсролын салбарт үүсээд байгаа энэ хямралт байдлаас түргэн хугацаанд гарахад зөвхөн багш нар гэлтгүй эцэг эхчүүдийн оролцоо, идэвх санаачлага маш чухал.

Манай үйлдвэрчний эвлэл нь монголын боловсролын салбарт ажиллаж байгаа 60 орчим мянган багш ажилчдыг эгнээндээ нэгтгэсэн ҮЭ-ийн томоохон холбоодын нэг юм.

БСШУ-ны Үйлдвэрчний холбооны зүгээс багш нарын цалин нэмэх асуудлаар урьд өмнө нь нилээдгүй тэмцлүүдийг өрнүүлж, тодорхой хэмжээний үр дүнгүүд ч бас тухай бүрт гарч байсан. Энэ удаагийн багш нарын цалин нэмүүлэх тэмцлийг манай ҮЭ-ийн зүгээс тууштай дэмжиж, тэмцлийг үр дүнд хүргэхийн төлөө тууштай ажиллана гэсэн байр суурьтай байгаа.

Үр хүүхэд, ирээдүй хойч үеийнхээ төлөө энэ үйлсэд эцэг, эхчүүд маань нэгдэж байгаа явдалд та бүхэндээ албан ёсоор дахин талархаж байгаагаа илэрхийлье” хэмээсэн юм.



Мөн энэ үеэр Багшдаа тусалъя эцэг эхчүүдийн холбооны тэргүүн Д.Дуламсүрэн, “Багшдаа тусалъя эцэг эхчүүдийн  холбоо Төрийн бус байгууллага 2017 оны  9 дүгээр сард  байгуулагдсан. Манай холбоо нь хуулийн дагуу улсын бүртгэлд бүртгүүлсэн өөрийн дүрмийн хүрээнд  Холбооны Тэргүүн, Гүйцэтгэх захирал ,удирдах зөвлөл гэсэн есөн хүний бүрэлдэхүүнтэй бөгөөд “Багшдаа тусалъя” эцэг эхчүүдийн холбооны тэргүүнээр  Д.Дуламсүрэн миний бие ажиллаж байна.

Мөн нийслэлийн дүүргүүд, хөдөө орон нутаг хариуцсан   зохицуулагчид, холбооны гишүүд,  дэмжигчидтэйгээр үйл ажиллагаа явуулж байгаа.  Багшдаа туслах эцэг, эхчүүдийн холбооны үйл ажиллагааны үндсэн зорилго нь  багш нарын эрх ашгийг хамгаалах, тэдэнтэй хамтран ажиллах, хүүхэд, гэр бүл, сургууль хоорондын уялдаа холбоог сайжруулах, боловсролын салбарт тулгамдаж буй олон асуудлыг шийдвэрлэхэд  эцэг эхчүүдийн оролцоог нэмэгдүүлэхэд чиглэгдэж байна.  

Монгол улс  2012 онд НҮБ-ын индэр дээрээс  Боловсролыг тэргүүлэх салбар гэж  тунхагласан төдийгүй  дэлхийн улс орнуудын хэмжээнд  бичиг үсэг бүрэн тайлагдсан, дээд сургууль төгсөгчдийн тоогоор дэлхийд тэргүүлж буй мэтээр зарладаг, бичдэг. Гэтэл боловсролын салбарт ажиллаж буй багш нар,  сургуулийн өмнөх боловсролын байгуулагын  багш, ажилчид хамгийн бага цалин авч нийгмийн  асуудал нь шийдэгдээгүй  сэтгэл зүйн дарамттай ажлаа хийцгээж байгаа нь нууц биш болсон. Энэ бүхний эцэст  багш нар нэгдэж Багшийн цалин нэмэгдүүлэх түр хороог байгуулан доороосоо тэмцэж  дуу хоолойгоо шийдвэр гаргагчдад хүргэж эхэллээ.

Багшдаа туслах эцэг эхчүүдийн холбоо нь үйл ажиллагаандаа зөвхөн багшийн цалинг нэмэгдүүлэх асуудал төдий бус боловсролын салбарын хөгжил дэвшил, боловсролын стандарт шаардлага, боловсролын үйлчилгээний хүртээмж чанарыг сайжруулахад эцэг эхчүүдийн оролцоог нэмэгдүүлэхэд чиглэсэн тодорхой ажлуудыг хийхээр төлөвлөж байна.

Эцэг эхчүүд үр хүүхдээ сургууль, багш нарт даатгаад орхидог тогтолцоо одоо ч амь бөхтэй оршсоор байна. Боловсролын талаар хийгдсэн олон судалгаа, шинжилгээний бүтээлүүдээс үзэхэд амжилт гаргаж буй хүүхдүүдийн ард хүүхдээ дэмждэг, цаг гаргадаг, зөв хүмүүжүүлсэн эцэг эхчүүд байдаг. Тиймээс манай холбоо “Сургууль багш - эцэг эхчүүд – хүүхдүүд” гэсэн гурвалсан холбоог бий болгох чиглэлд эцэг эхчүүдийг татан оролцуулах зорилгыг давхар агуулан ажиллаж байна.

Бидний хүүхдүүд сургуулийн өмнөх боловсролоос эхлээд бага, дунд сургууль, цэцэрлэгтээ амьдарлынхаа мэдлэг чадвар, боловсролыг авч, ирээдүйд хүн болон төлөвших язгуур суурь хүмүүжлээ олж авдаг. Тиймээс энэ мэдлэгийг түгээж буй багш нарынхаа цалин хөлс, нийгмийн асуудлыг шийдэх чиглэлд Засгийн газар, Боловсролын яамыг оновчтой зөв шийдвэр гаргатал нь эцэг эхчүүд бид шахаж шаардаж, дуу хоолойгоо нэгтгэж ажиллах болно”хэмээн онцолсон юм.





Х.Онон


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх