Монгол түмэндээ зориулав.


Шуурхай мэдээ

Бохир амыг чинь бохь зажилж цэвэрлэдэг юм шүү дээ

Нийтэлсэн: Монгол Хүү | Нийгэм
2017 09 сар 25 ・ 710

 

          

  Яадгийм, хуралдаан дээр бохь зажлаа л биз. Бохир амыг чинь бохь зажилж л цэвэрлэдэг байхгүй юу. Яадгийм ангалзаа л биз. Бохь зажилж байгаа хүн чинь ангалзахгүй тэгээд яах юм гэх мэтээр Н.Амарзаяа гишүүнийг өмөөрөх шалтгаан олон байна. Хамгийн наад зах нь амны ариун цэвэр сахих нь цэвэрч нямбай хүний л дадал зуршил биз дээ. Тэр ч бүү хэл Монгол Улсын тэрбумтануудын нэг “Ажнай” Д.Бат-Эрдэнийг  Өмнөговь аймагт сөхрүүлээд УИХ-д орж ирсэн аз одыг нь хүндэтгэж үзээч. Тэр муу бохийг хаана ч хэн ч зажилж л байдаг биз дээ. Ямар Төрийн ордонд дотуур өмдөө өмссөн өмсөөгүй тухай ярьсан биш.

Ийнхүү нийгмийн савлагаа, сонгогчдын арга мухардсан цагийн давалгаанд Өмнөговь аймгаас УИХ-д сонгогдсон гишүүн Н.Амарзаяагийн тухайд таатай мэдээлэл төдийлөн үгүй. Тэрбээр намын даргаа Ерөнхийлөгчийн сонгуульд дэмжихээр өмнөговьчуудтай уулзахдаа сонгогчдоо тас загначихсан нь мулгуудуу үйлдэл болсон. УИХ-ын сонгуулийн түүхэнд сонгогчдоо тас загнасан бараг анхны тохиолдол байх. Түүнээс бус “Буян” Б.Жаргалсайхан мэт нь сурталчилгааныхаа явцад сонгогчдыг загнаж байгаад унаад сурчихсан хүн. Нийгэм, эдийн засгийн хүнд нөхцөлд болж байгаа уулзалтаас таатай уур амьсгал хүлээхийн хэрэггүй гэдгийг эрхэм гишүүн даанч мэдсэнгүй л дээ. Аргагүй шүү дээ, өндөр дээд сэнтийд заларсан бүсгүй хүн ядуу дорд ардын зовлонг яаж мэдэх юм бэ. Өөр шигээ л санаж эндүүрсэн хэрэг хэмээн өршөөж болно шүү дээ.

Тиймээс л эрхэм гишүүн маань  “... Би та нараар ажлаа дүгнүүлэх болоогүй байна. Би чамайг гуйгаагүй шүү. Чи битгий давраад байгаарай” гээд тас загначихсан гэж байгаа. Үнэний хувьтай даг. Нэгдүгээрт, УИХ-ын гишүүн болоод нэг жил гаруйхан хугацаа болж байхад ажлыг нь дүгнэх гээд байдаг нь сонгогчид нь хаашаа юм бэ. Цаана нь чилийсэн гурван жил байхад яагаа ч үгүй ажилд нь дүн тавих гэдэг буруу бололтой. Дөрвөн жилийн дараа дүгнэх ёстой байж. Гэхдээ эрхэм гишүүн маань 2020 оны дүнгээ энэ үеэр тавиулчихсан ч байж мэднэ. Хоёрдугаарт, үнэхээр тэр сонгогчдыг тэгтлээ гуйгаагүй байж мэднэ. Яагаад гэвэл Монголын нэг тэрбумтантай халз тулсан. Нөгөө талаар анх удаа намын мандат авсан, олны танил бус гээд олон шалтгаан байсан шүү дээ. Тэгэхээр арга буюу намын мандат өвөртөлсөн хүн сурталчилгаа хийж намайг сонгоод өгөөч гээд явснаас тийм ч өндөр итгэлтэй байгаагүй болов уу. Үүнээс дүгнэж харахад үнэн голоосоо гуйгаагүй шүү гэдгээ л хэлсэн хэрэг. Гуравдугаарт, сонгогчид арай л “даварсан”. Дэлхийд данстай том орд газартай хамгийн баян аймгийн иргэд олон зовлон тоочоод гишүүний ажлыг дүгнэх гээд байгаа нь буруу юм. Түүний физикийн багш мэргэжил нь нөлөөлөөд ийнхүү сонгогч олныг эгээ л сурагчид шиг загнахад хүргэсэн байхыг бас үгүйсгэхгүй. МАН-аас бүрдсэн Засгийн газар 1.6 хувьд уруудсан эдийн засгийг 5.6 хувьтай болгон өсгөөд байхад ийнхүү зовлон тоочиж гишүүнээ боорлоод байхаар хэн ч гэсэн “давраад бай” гэж загнах байлгүй. Хэдийгээр эдийн засагч мэргэжилтэй ч эдийн засаг өсөхөд Н.Амарзаяагийн хувь нэмэр өчүүхэн ч байгаагүй байж болно. Гэхдээ түүний сонгогдсон нутагт байдаг Тавантолгойн орд газрын нүүрсний үнэ өссөнтэй шууд холбоотой гэдгийг санах л хэрэгтэй байж.

Ийнхүү намынхаа даргыг Ерөнхийлөгчийн сонгуульд ташуурдан дэмжихээр аяны дөрөө авсан Н.Амарзаяа маань тойргийнхоо сонгогчдыг зад загнаж суухдаа чухам юу бодсон бол. М.Энхболд даргыгаа сонгуульд битгий дэмжээрэй гэсэнтэй агаар нэгэн бус уу. Ийм л нэгэн шударга ч гэмээр, мулгуу ч гэмээр явдал болсон нь түүний ирээдүйн улстөрийн карьерт лав сайнаар нөлөөлөхгүй. Зад загнасан сонгогчидтойгоо 2020 онд ахиад нүүр тулна, тэр. Ингэхдээ та нараар ажлаа дүгнүүлэхгүй, битгий давраад бай гээд зогсохгүй нь лавтай. Хүн л болсон хойно энэ бүгдээ гэрэлтүүлэх ямар нэгэн арга тактик бодож л суугаа байлгүй. Харин эрхэм гишүүн маань бохь зажилсан тухайд байр сууриа илэрхийлэхдээ  “Тухайн үед би тийм алдаа гаргасан нь үнэн. Тэр үйлдлээсээ уучлал хүсье. Маш том сургамж боллоо гэж харж байна. Нөгөө талаараа би олны анхааралд орсон УИХ-ын гишүүн болжээ гэдгээ илүү мэдэрсэн” гэжээ. Үүнээс харвал олны анхааралд өртөх гэж бохь зажилсан ч юм шиг. Нэрд гарах өвчинд нэрвэгдээд сүйд болоогүй ч хувь улстөрчид өөрийн гэсэн карьераа өсгөх арга байдгийг нуух юун.

Н.Амарзаяа бусад гишүүдээс тэс өөр замналаар явж энэ өндөрлөгт ирсэн нэгэн. УИХ-ын түүхэнд Намхайнямбуу баатараас өөр малчин сууж байгаагүй л болов уу. Ямартай ч Н.Амарзаяа гишүүн малын захаас ажил амьдралынхаа гарааг эхлүүлсэн түүхтэй. Тэр хэн нэгэн даргын нөмөр бараадаж, цүнх зөөгөөгүй, аймгийнхаа Иргэдийн төлөөлөгчдийн хуралд найман жил төлөөлөгчөөр ажиллаж, аймгийнхаа МАН-ын дэд дарга, даргаар ажилласан гэхээр бас чиг өөрийнхөө орон зайг сонгогчдын дунд бүрдүүлсэн хүн гэдгийг мартаж болохгүй. Өнөөдөртөө түүгээр овоглох хууль хараахан төрөөгүй байгаа ч нийтээр тэмдэглэх баярын болон тэмдэглэлт өдрүүдийн тухай хууль, Хүнсний тухай хуульд нэмэлт өөрчлөлт оруулах тухай хууль зэрэг хуулийн төслийг санаачлахад оролцсон байдаг. Эрхэм гишүүний өөрийнх нь хэлсэнчлэн одоогоор түүний ажлыг дүгнэх хараахан биш ч байж болно. Гэхдээ нэг жил гаруйн хугацаа гэдэг бол ажил хийдэг хүнд бага хугацаа биш. Ямартай ч өмнийн говиос сонгогдсон ийм нэгэн гишүүн парламентад байдгийг санахад илүүдэхгүй. Хэрвээ тэр бохь зажилж, сонгогч олноо загнаагүй бол олны танил болоо ч билүү үгүй ч билүү.

С.Ууганбаяр


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх