Монгол түмэндээ зориулав.


Шуурхай мэдээ

Д.АМАРБАЯСГАЛАН:АРДЧИЛЛЫН 30 ЖИЛД АНХ УДАА НЭГ НАМ ДАРААЛАН ЗАСГИЙН ЭРХ БАРИХ ГЭЖ БАЙНА

Нийтэлсэн: Монгол Хүү | Улстөр
2020 06 сар 25 ・ 973

УИХ-ын сонгуулийн үр дүнтэй холбогдуулан МАН-ын Ерөнхий нарийн бичгийн дарга, МАН-ын сонгуулийн штабын ерөнхий менежэр Д.Амарбаясгалан мэдээлэл хийв.

Д.Амарбаясгалан:

2020-2024 оны парламентын сонгуульд  МАН урьдчилсан байдлаар 62 суудал авч ялалт байгуулаад байна. Хүчээ нэгтгэн бидэнд итгэж Ерөнхий сайдаа багаар нь дэмжсэн Монгол Улсын Ерөнхий сайд У.Хүрэлсүх болон МАН-ын мянга мянган гишүүдийн нэрийн өмнөөс талархаж байгаагаа илэрхийлж байна. Дэлхийн нийтийн цар тахлын үед УИХ-ын сонгуулийг хариуцлагатай зохион байгуулсан СЕХ болон төрийн жинхэнэ албан хаагчиддаа нийт ард иргэдийнхээ өмнөөс талархал дэвшүүлж байна. Сонгуульд өрсөлдсөн улс төрийн нам эвслүүд, бие даагчид нартаа шударга байсанд талархаж байна.

УИХ-ын сонгуулийн үр дүнд хүрэхийн тулд дараах гурван зүйлийг гол тулгуур болголоо.

Нэгдүгээрт, МАН олон хүний дэмжлэгийг хүлээсэн хүмүүсийг 29 тойрогт нэр дэвшүүлсэн. Нэр цэвэр мэдлэг туршлагатай, эх орноо гэсэн сэтгэлтэй нэр дэвшигчдийг төрийн эрх барих дээд байгууллагад сонгуулахаар ард түмэндээ илгээсэн. Монгол төрийн босго өндөр гэдгийг онцгойлон харгалзан үзэж, парламентын сонгуульд шинжлэх ухааны үндэслэл суурьтайгаар нэр дэвшигчдээ тодруулсан.

Хоёрдугаарт, МАН ард иргэддээ хийсэн ажлаа тайлагнаж, хийж ажлаа танилцуулж цаашдын хүсэл зорилгоо тайлбарлан таниулж, бодлогын бүтээлч өрсөлдөөнийг бий болгохыг хичээсэн. Цаашид Монгол төрийн сонгууль шударга, бодлогын өрсөлдөөн байх ёстой.

Гуравдугаарт, Ерөнхий сайд, МАН-ын дарга У.Хүрэлсүхийн Засгийн газар сүүлийн 20-30 жилд хүлээгдэж байсан овоорсон олон асуудлуудыг бодитоор шийдвэрлэж чадсан. Мөн шударга ёсны галыг асаасныг Монголын ард түмэн дэмжлээ.

Ерөнхий сайдаа багаар нь сонгосон нийт ард иргэддээ дахин талархлыг дэвшүүлье. Монголын ирээдүй залуу сонгогч нартаа баярлалаа. Шинэ үеийнхэн шинэ мянганыхан эрх чөлөөний дархлаатай, хүсэл мөрөөдлийнхөө төлөө хүчтэй тэмцэгчид болон бойжиж буйг энэ сонгуулийнхаа туршид бид ажиглалаа. МАН шинэ залуу үеийнхний гэрэл хүсэл мөрөөдлийг дэмжин хүчээ нэгтгэн хамтран ажиллахаа илэрхийлж байна.

2020 оны УИХ-ын сонгуулийн үр дүн бол эхлүүлснээ дуусгаарай, задарсныг засаарай, ядарсныг хайрлаарай гэсэн ард түмний захиа даалгавар гэж бид ойлгож байгаа. Итгэл бүхнийг зүтгэлээр хариулах өндөр үүрэг хариуцлага бидэнд ирлээ.

Энэ удаагийн УИХ-ын сонгуульд МАН ялалт байгуулснаар сүүлийн 30 жилийн ардчилал, эрх чөлөөт нийгэмд анх удаагаа нэг нам хоёр дахь удаагаа засгийн эрх барих гэж байна

МАН “Хөгжлийн гэрээ” мөрийн хөтөлбөрөө биелүүлэх ажилдаа өнөөдрөөс эхлээд орж байна. Амжилтаа бататган алдаа дутагдлаа засч, эхлүүлснээ дуусгахын төлөө бид хичээн зүтгэнэ.

Ингээд урьдчилсан дүнгээр ялсан нэр дэвшигчдээ  танилцуулья.

  • 1 дүгээр тойрог Архангай аймаг-Ж.Мөнхбат, Ё.Баатарбилэг, Г.Тэмүүлэн
  • 2 дугаар тойрог Баян-Өлгий Х.Баделхан, Т.Аубакер
  • 3 дугаар тойрог Баянхонгор Г.Занданшатар,
  • 4 дүгээр тойрог Булган Ц.Анандбазар, Ж.Бат-Эрдэнэ
  • 5 дугаар тойрог Говь-Алтай Б.Энх-Амгалан, Ш.Раднаасэд
  • 6 дугаар тойрог  Говьсүмбэр,-Дундговь-Г.Мөнхцэцэг, Сү.Батболд
  • 7 дугаар тойрог Дорнод -Х.Болорчулуун, Ц.Сэргэлэн
  • 8 дугаар тойрог Дорноговь -Б.Дэлгэрсайхан, Т.Энхтүвшин
  • 9 дүгээр тойрог Завхан- Ц.Цэрэнпунцаг, Б.Баярсайхан
  • 10 дугаар тойрог Өвөрхангай-С.Чинзориг, Д.Тогтохсүрэн, Г.Ганболд
  • 11 дүгээр тойрог Өмнөговь- Н.Наранбаатар
  • 13 дугаар тойрог  Сэлэнгэ аймаг- Ж.Эрдэнэбат, Ч.Ундрам, Ч.Өнөрболор
  • 14 дүгээр тойрог Төв аймаг-Н.Энхболд, Ж.Батжаргал
  • 15 дугаар тойрог Увс аймаг-Ч.Хүрэлбаатар, Б.Чойжилсүрэн
  • 16 дугаар тойрог  Ховд аймаг- С.Бямбацогт
  • 17 дугаар тойрог Хөвсгөл аймаг-Л.Энх-Амгалан, Ц.Даваасүрэн, Л.Мөнхбаатар
  • 18 дугаар тойрог Хэнтий аймаг- У.Хүрэлсүх, Л.Оюун-Эрдэнэ, Б.Бат-Эрдэнэ
  • 19 дүгээр тойрог-Б.Жавхлан, Г.Дамдинням,Б.Баттөмөр
  • 20 дугаар тойрог Орхон аймаг-Д.Батлут
  • 21 дүгээр тойрог Багануур, Багахангай, Налайх-С.Амарсайхан, Ц.Сандаг-Очир
  • 22 дугаар тойрог Баянзүрх дүүрэг-Б.Энхбаяр, Б.Саранчимэг
  • 23 дугаар тойрог Баянзүрх дүүрэг-Ж.Чинбүрэн, Х.Булгантуяа, Э.Бат-Амгалан
  • 24 дүгээр тойрог Сүхбаатар дүүрэг- Д.Цогтбаатар, Ц.Мөнх-Оргил, Ц.Мөнхцэцэг
  • 25 дугаар тойрог Чингэлтэй дүүрэг-Т.Аюурсайхан, М.Оюунчимэг, Ж.Сүхбаатар
  • 26 дугаар тойрог Баянгол дүүрэг-Ж.Ганбаатар, Х.Ганхуяг,
  • 27 дугаар тойрог Сонгинохайрхан дүүрэг-Х.Нямбаатар, Б.Жаргалмаа
  • 28 дугаар тойрог Сонгинохайрхан дүүрэг-Н.Учрал, Д.Сумъяабазар, П.Анужин
  • 29 дүгээр тойрог Хан-Уул дүүрэг Г.Амартүвшин, Д.Сарангэрэл

Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй