Монгол түмэндээ зориулав.


Шуурхай мэдээ

Монголын хоёр жүдоч дэлхийн аваргын хошой медальтан боллоо

Нийтэлсэн: Монгол Хүү | Спорт
2017 08 сар 29 ・ 370

Наймдугаар сарын 28-наас есдүгээр сарын 3-ны өдрүүдэд Унгарын Будапешт хотод жүдо бөхийн насанд хүрэгчдийн дэлхийн аварга шалгаруулах тэмцээн болж байна. Энэ удаа 126 орны эрэгтэй, эмэгтэй 731 бөх өрсөлдөж байгаа аж.

Манай улс бүтэн багаараа оролцож байгаа бөгөөд эрэгтэйчүүдийн 60 кг-д Г.Болдбаатар, Д.Амартүвшин, 66 кг-д Г.Хэрлэн, 73 кг-д Г.Одбаяр, 81 кг-д О.Ууганбаатар, 90 кг-д Г.Алтанбагана, -100 кг-д Л.Отгонбаатар, +100 кг-д Н.Түвшинбаяр, Ө.Дүүрэнбаяр, эмэгтэйчүүдийн 48 кг-д М.Уранцэцэг, 52 кг-д Б.Хорлоодой, Ч.Аззаяа, 57 кг-д Д.Сумъяа, Л.Энхрийлэн, 63 кг-д Б.Ганхайч, Б.Мөнгөнчимэг, 70 кг-д Ц.Наранжаргал, +78 кг-д Б.Мөнхтуяа нар барилдана.

Өчигдөр эхний өдрийн барилдаан болоход эрэгтэйчүүдийн 60 кг-д дэлхийн аваргын алтан медальт Г.Болдбаатар, мөнгөн медальт Д.Амартүвшин, эмэгтэйчүүдийн 48 кг-д дэлхийн аваргын алтан медальт М.Уранцэцэг нар эх орноо төлөөлөн татами дээр гарсан.

Эрэгтэйчүүдийн 60 кг-д дэлхийн аваргын хүрэл, Европын анхдугаар наадмын мөнгө, хүрэл медальт Гүржийн А.Папинашвили, Олимпийн мөнгө, дэлхийн аваргын алтан медальт Казахстаны Ю.Сметов, Олимпийн хүрэл, дэлхийн аваргын алт, хүрэл медальт Японы Н.Такато, Монголын дэлхийн медальтнууд Г.Болдбаатар, Д.Амартүвшин тэргүүтэй 60 бөх барилдсан.

2013 оны дэлхийн аваргын мөнгөн медальт Д.Амартүвшин эхний тойрогт БНАСАУ-ын Пак Юн-Намыг ваза-ари, хоёрт Аргентиний Хосе Луйс Галванг ваза-аригаар ялсан ч шөвгийн 16-д Казахстаны залуу бөх К.Гусманд ваза-ари үнэлгээ алдаж хожигдсон.

Харин 2014 оны дэлхийн аваргын алтан медальт Г.Болдбаатар урамтай сайхан барилдаж, хүрэл медаль авсан юм. Тэрээр эхний тойрогт Туркийн Б.Өзлуг торгуулиар, хоёрт Францын В.Хяарыг юүкогоор, гуравт Японы Р.Нагаяамаг юүкогоор хожсон ч шөвгийн наймд Узбекистаны Ж.Урозбоевт ялагдсан.

Гэхдээ дагах барилдаанд Казахстаны Ю.Сметовыг, хүрэл медалийн төлөө Чехийн П.Петриковыг юүко үнэлгээ авч ялснаар дэлхийн аваргын хошой медальтан болсон юм. Энэ жинд Японы Н.Такато алт, Азербайжаны О.Сафаров мөнгөн медаль хүртжээ.

Эмэгтэйчүүдийн 48 кг-д Олимпийн хүрэл, дэлхийн аваргын алтан медальт Японы А.Кондо, Олимпийн хүрэл медальт Казахстаны нэрийн өмнөөс барилдаж буй Г.Отгонцэцэг, дэлхийн аваргын алтан медальт Г.Уранцэцэг тэргүүтэй 40 гаруй бөхчүүд барилдсан.

Манай Г.Уранцэцэг “С” хэсгийг тэргүүлэн эхний тойрогт гоц мөргөж, хоёрт Румын улсын А.Попыг, гуравт БНСУ-ын К.Ю.Жунг, хэсгийн аваргын төлөө Францын М.Клементыг тус тус илүүрхэн ялсан.

Улмаар хагас шигшээд 2016 оны зуны Олимпийн наадмын хүрэл медалийн төлөө барилдан ялагдсан Японы А.Кондотой учраа таарсан. Энэ барилдаанд Г.Уранцэцэг ваза-ари үнэлгээ авч ялалт байгуулсан ч аваргын төлөө өөр нэг Япон бөх Ф.Тонакид юүкогоор ялагдан мөнгөн медаль авсан юм.

Ингэснээр М.Уранцэцэг дэлхийн аваргын алт, мөнгөн медальт бөх болж байна. Өнөөдөр хоёр дахь өдөр эрэгтэйчүүдийн 66 кг-д Г.Хэрлэн эхний тойрогт Узбекистаны Н.Сардовтой, эмэгтэйчүүдийн 52 кг-д Б.Хорлоодой эхний тойрогт Доминиканы Д.Жейсустай барилдах оноолт гарчээ.

2017 оны жүдо бөхийн дэлхийн аваргын эхний өдөр медаль хүртсэн орнууд

 
 

Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх