Монгол түмэндээ зориулав.


Шуурхай мэдээ

Хүн ам, орон сууцны 2020 оны Улсын ээлжит тооллогын товоо угтлаа

Нийтэлсэн: Монгол Хүү | Нийгэм
2020 01 сар 09 ・ 515

Монгол Улсын Их Хурлын тухай хуулийн 43 дугаар зүйлийн 43.1 дэх хэсэг, Хүн ам, орон сууцны улсын тооллогын тухай хуулийн 8 дугаар зүйлийн 8.2 дахь хэсгийг үндэслэн Монгол Улсын Их Хурлаас Хүн ам, орон сууцны Улсын ээлжит тооллогын товыг 2020 оны 01 дүгээр сарын 08-наас 09-нд шилжих шөнийн “00” /тэг тэг/ цагаар тогтоосон байдаг.

Товын дагуу ҮСХ-ны удирдлагууд болон холбогдох албаныхан 2020 оны нэгдүгээр сарын 8-ны 23.30 цагт Нийслэл, 21 аймаг, 9 дүүргийн тооллогын түр товчоотой онлайнаар холбогдож, тооллого орон даяар албан ёсоор эхэлснийг мэдэгдлээ.

Энэ үеэр ҮСХ-ны дарга А.Ариунзаяа аймаг, нийслэл, дүүргийн албан хаагчид болон бэлтгэгдсэн тоологч нарт анхаарал болгоомжтой ажиллаж, эрсдэлийг урьдчилан харж, ямар нэгэн асуудал тулгарвал тухай бүрт нь мэдэгдэж, хариуцлагатай ажиллахыг анхаарууллаа.

ҮСХ-ны ХАНСГ-ын дарга А.Амарбал “Тооллогын тов буюу 00:00 цаг гэдэг нь энгийн үгээр хэлбэл зураг авч буй агшин юм. Бид энэ удаа түүхэндээ анх удаа хосолмол тооллогын товыг албан ёсоор угтлаа. Ингээд товтой зэрэгцүүлэн Хүн ам, өрхийн мэдээллийн санг түр зогсоож, Хүн ам, орон сууцны 2020 оны Улсын ээлжит тооллогын нэгдсэн сан бий болгоно.
Статистикч, анхан шатад ажиллаж буй тоологч, шалгагч нэг бүрийн итгэл, сэтгэл тооллогын үр дүнд шууд нөлөөлдөг. Тиймээс Хүн ам, орон сууцны 2020 оны Улсын ээлжит тооллогод оролцож буй хүмүүсийг сэтгэл санаагаар дэмжиж ажиллах нь нэн чухал. Үүнээс гадна олон жилийн дүнгээс харахад тоологчийн аюулгүй байдалд байнга анхаарах ёстой байдаг юм. Та бүхнийхээ тооллогын ажилд амжилт хүсье” гэлээ.

Хүн ам, орон сууцны тооллогын тухай хуулийн 8.3-т заасны дагуу ээлжит тооллогыг товлосон өдрөөс эхлэн долоо хоногт багтаан явуулахаар заасан байдаг. Уг заалтын дагуу Хүн ам, орон сууцны 2020 оны Улсын ээлжит тооллогын нэг хэсэг болох энгийн санамсаргүй түүврийн аргаар тоолох 10 хувийг 2020 оны нэгдүгээр сарын хоёр дахь долоо хоног буюу энэ сарын 9-15-ны өдрийн 22.00 цаг хүртэл хугацаанд тоолно.


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх