Монгол түмэндээ зориулав.


Шуурхай мэдээ

Хотын мээрийн “хэрэггүй” орлогч

Нийтэлсэн: Монгол Хүү | Нийгэм
2019 08 сар 30 ・ 632

-Зөв цагт, хэрэгтэй газраа байх ёстойгоо мэдэхгүй яваа хотын орлогчоос болж нийслэл “Хүүхдэд ээлтэй” байхаасаа ч хөг нь өнгөрч байгаа бололтой-

Нийслэлийн Засаг дарга бөгөөд Улаанбаатар хотын дарга 6 орлогч хэрэггүй, 2 байхад болно гээд Ж.Батбаясгалан, Ш.Анхмаа нартай ажлаа “хуваалцах”-аар болсон. Яах вэ, албан тушаалыг багасгаж, хариуцах цар хүрээг нь өргөтгөсөн хэрэг. Гэтэл нийслэлд хамгийн чухал буюу Хүний хөгжил, нийгмийн бодлогын асуудал хариуцсан орлогч гэх Ш.Анхмаа энд, тэнд очиж тууз хайчилж, нээлтэд оролцохоос бусдаар бол бултаж, зугатаад олдохоо байжээ.

Өчигдөр л гэхэд “Хүүхдэд ээлтэй хот” дэд хөтөлбөрийн төслийг НИТХ-ын Тэргүүлэгчдийн хуралдаанаар өнөөдөр хэлэлцэх байсан боловч хэлэлцсэнгүй. Угнь энэ хөтөлбөрийн төслийг аль эрт буюу тавдугаар сарын 1-нд Нийслэлийн Засаг даргад өргөн барьж, НИТХ-ын Хуралдааны дэгийн 6 дугаар зүйлийн 6.1, 6.2 заалтаар дэмжигдсэн байдаг.

Бүтэн 3 сарын дараа хэлэлцэх гэсэн ч Нийслэлийн Засаг даргын орлогч Ш.Анхмаа нь хуралд оролцох боломжгүй гэдгээ дуулгажээ. Мөн Нийслэлийн Гэр бүл, хүүхэд, залуучуудын хөгжлийн газрын дарга Ө.Ган-Өлзий нь ч хуралдаанд оролцсонгүй. Засаг даргын Тамгын газрын Нийгмийн хөгжлийн хэлтсийн дарга М.Эрдэнэжаргал нь Гэр бүл, хүүхэд, залуучуудын хөгжлийн газраас албан бичгээр хариу ирсэн эсэхийг мэдэхгүй байгаагаа хэлж, одоо хөтөлбөр батлах шаардлагатай эсэх талаар тайлбар хийж, дэд хөтөлбөрийн төсөл гацаж орхилоо. НИТХ-аар хэлэлцэх асуудлын жагсаалтыг аль хэдийн гаргачихсан тул Ш.Анхмаа болон бусад дарга нар нь ч ажлаа төлөвлөж, асуудалд ажил хэрэгчээр хандаж болох л байсан.

Харамсалтай нь тэгсэнгүй. Тийм сонирхол ч байгаагүй бололтой. Учир нь хотын мэр дэмжээд бүтэн 3 сарыг үдэж байна. Гэтэл Ш.Анхмаа өөрийнх нь хариуцах үүрэгт ажлаа хийхгүй, түүгээр ч зогсохгүй холбогдох газар, хэлтсийн удирдлагуудаа ч хуралдаанд оролцуулахгүй байгаа нь хэр зохистой үйлдэл вэ. Мэдээж олон төсөл хөтөлбөрийг хэрэгжүүлдэг. Гэхдээ нийслэлд хамгийн ихээр тулгамдаж буй асуудал нь хүүхэд, тэдний эрхтэй холбоотой байдаг гэдгийг хүн бүр мэднэ. Харамсалтай нь зөв цагт, хэрэгтэй газраа байх ёстойгоо мэдэхгүй яваа хотын орлогчоос болж нийслэл “Хүүхдэд ээлтэй” байхаасаа ч хөг нь өнгөрч байгаа бололтой.

Эсвэл хөөрхий нэгэнт ээлтэй байж чадахгүйг нь мэдээд тийн хуралдаанд оролцоогүй ч юм болов уу гэх эргэлзээг ч төрүүлэх шиг. Гэвч Ш.Анхмаагийн хувьд Засаг даргадаа тийн хотын үнэн төрхийг хэлж, өөрийнхөө албан тушаалыг “боомилохгүй” л байх л даа. Уг нь хотын орлогч нар шаардлагатай үед хариуцсан салбараа аваад явах учиртайсан. Ямартай ч түүний энэхүү үйлдэл хариуцлагатай  албан тушаалыг үлгэн салган хийж хотын мээрийнхээ нэр хүндийг гутааж хэрэггүй орлогчийнх ньнэг гэдгийг харууллаа.

Эх сурвалж: Erennews.mn 


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй

Сэтгэгдэл үлдээх

  • Зочин / 2019 09 сар 10/

    Хэрэггүй хоолны савнууд төсвөөс цалин цусалаад инээгээд л явдаг азтай луйварчингууд шүү.

    Хариулах